लखनऊ - तब्बल १२ महिन्यानंतर आंतरराष्ट्रीय सामना खेळणाऱ्या भारतीय महिला क्रिकेट संघाला, पहिल्याच सामन्यात पराभवाचा जबर धक्का बसला. दक्षिण आफ्रिकेच्या महिला संघाने पहिल्या एकदिवसीय सामन्यात भारतीय महिला संघाचा ८ गडी राखून पराभव केला. या विजयासह आफ्रिका संघाने पाच सामन्याच्या मालिकेत १-० ने आघाडी घेतली.
भारतरत्न अटल बिहारी वाजपेयी एकाना स्टेडियममध्ये खेळवण्यात आलेल्या सामन्यात भारतीय महिला संघाने प्रथम फलंदाजी केली. कर्णधार मिताली राजच्या अर्धशतकी (५०) खेळीच्या जोरावर भारताने ५० षटकात ९ बाद १७७ धावांपर्यंत मजल मारली. मितालीने ८५ चेंडूत चार चौकार आणि १ षटकारासह ५० धावांची खेळी केली. मितालीचे हे करियरमधील ५४ वे अर्धशतक ठरले. आफ्रिकेकडून शब्निम इस्माइल हिने सर्वाधिक ३ विकेट घेतल्या. तर नोनकुललेको हिने २, मरिजाने काप, अयाबोंगा खाका आणि सूने लूस यांनी प्रत्येकी १-१ गडी बाद केला.
भारताने विजयासाठी दिलेले १७८ धावांचे आव्हान आफ्रिकेच्या संघाने ४०.१ षटकात २ गड्यांच्या मोबदल्यात सहज पूर्ण केले. आफ्रिकेकडून लिजेल ली हिने नाबाद ८३ धावांची खेळी केली. तर बोल्वार्डटने ८० धावा केल्या. उभय संघातील दुसरा एकदिवसीय सामना ९ मार्चला खेळला जाणार आहे.
हेही वाचा - इंग्लंड संघातून 'या' खेळाडूला लवकरच मिळणार डच्चू; वॉनची भविष्यवाणी
हेही वाचा - ब्रेकिंग न्यूज! आयपीएलच्या चौदाव्या हंगामाचे वेळापत्रक आले समोर
