मुंबई - “एक कॉफीचा कप मला महागात पडला म्हणून मी आता ग्रीन टी पितो”, असे हार्दिकने गंमतीशीररित्या म्हटले आहे. इन्स्टाग्राम चॅटदरम्यान हार्दिक आणि दिनेश कार्तिक बोलत होते. तेव्हा हार्दिकने आपला अनुभव सांगितला. २०१९मध्ये ‘कॉफी विथ करण शो’ दरम्यानच्या वादग्रस्त वक्तव्याबद्दल हार्दिकवर खूप टीका झाली होती.
या चर्चेदरम्यान हार्दिक म्हणाला, “मी कॉफी पीत नाही, ग्रीन टी पितो. मी फक्त एकदा कॉफी प्यायलो होतो. ती मला महागात पडली होती. मी पैज लावतो, की स्टारबक्समध्येही इतकी महाग कॉफी मिळत नाही. त्या घटनेपासून मी कॉफीपासून दूर राहतो.” या लाइव्ह चॅटदरम्यान हार्दिकसोबत त्याचा भाऊ कृणाल पांड्याही सहभागी झाला होता.
२०१९मध्ये हार्दिकने सलामीवीर लोकेश राहुलसमवेत कॉफी विथ करण शोमध्ये महिलांविषयी वादग्रस्त वक्तव्य केले होते. या वक्तव्यानंतर त्यांच्यावर टीका झाली होती आणि या दोघांना भारतीय संघातून निलंबित करण्यात आले होते.
