गेल्या वर्षी प्रदर्शित झालेली वेब सिरीज ‘एक थी बेगम’ प्रेक्षकांच्या पसंतीस उतरली होती. अर्थातच त्याचा दुसरा भाग येणे अपेक्षित होते. अपेक्षेप्रमाणे ‘एक थी बेगम’ चा दुसरा भाग येऊ घातला आहे. यातील अशरफच्या भूमिकेत मराठमोळी अभिनेत्री अनुजा साठे प्रमुख भूमिकेत होती आणि दुसऱ्या पर्वातही कथानक तिच्याच भोवती फिरताना दिसेल. एक थी बेगम च्या दुसऱ्या पर्वाची सुरुवात लीला पासवानच्या शोधाने सुरु होते. मृत्यूचे सोंग घेतलेली अशरफ दुबईचा डॉन मकसूदला, जी भूमिका अभिनेता अजय गेही साकारतोय, संपवण्याच्या आपल्या ध्येयाच्या दिशेने झेपावते. आपला पती झहीरच्या, जी भूमिका ‘फतेहशिकस्त’ मधील अंकित मोहन ने साकारली होती, मृत्यूचा बदला घेण्याच्या आपल्या प्रतिज्ञेवर ती ठाम राहाते. अशरफ स्वतःला गुन्हेगारी जगतात झोकून देते.
- " class="align-text-top noRightClick twitterSection" data="">
गुन्हेगारी पार्श्वभूमी आली म्हणजे बंदूकही आली. हातात खरी बंदूक घेऊन चालवणे, किती भीतीदायक असू शकते, याची आपल्याला तितकीशी कल्पना नाही. हेच अनुजा साठेने प्रत्यक्षात अनुभवले. अनेक देशभक्ती किंवा गॅंगवॉरवर आधारित चित्रपटांमध्ये आपण गुंडांना किंवा दहशतवाद्यांना अगदी सहजरित्या गोळीबार करताना, रक्तपात घडवताना पाहातो जे खरेही वाटून जाते इतक्या कौशल्याने हे चित्रित केलेले असते. एमएक्स प्लेअर ओरिजनलच्या 'एक थी बेगम २' या वेबसिरीजची नायिका अनुजा साठे हिने पडद्यावर अतिशय सहजरित्या बंदूक हाताळली आहे. अर्थात त्यासाठी तिने प्रशिक्षण घेतले.
बंदूक हाताळण्याच्या अनुभवाबद्दल अनुजा साठे म्हणते, '''एक थी बेगम २' मधील माझी भूमिकेची गरज म्हणून मी बंदूक हाताळली, तो अनुभव खूपच दडपण आणणारा आणि भीतीदायक होता. परंतु जेव्हा तुम्ही सूडाच्या भावनेने जेव्हा पेटलेले असता, तेव्हा हे सर्व नगण्य होऊन जाते. आयुष्यात पहिल्यांदा हातात जेव्हा मी बंदूक घेतली होती तेव्हा माझ्या अंगावर शहारे आले होते आणि ही अजिबात अतिशयोक्ती नाही. शूटिंगच्या सेटवर बंदूक चालवण्याअगोदर मी प्रशिक्षण घेतले होते, ज्याचा मला निश्चितच फायदा झाला.''
सचिन दरेकर आणि विशाल मोढावे दिग्दर्शित 'एक थी बेगम'च्या दुसऱ्या सीझनमध्ये शहाब अली, चिन्मय मांडलेकर, विजय निकम, रेशम श्रीवर्धनकर, राजेंद्र शिसाटकर, नझर खान, हितेश भोजराज, सौरासेनी मैत्रा, लोकेश गुप्ते, मीर सरवर, पूर्णानंदा वाडेकर आणि रोहन गुजर यांच्या प्रमुख भूमिका आहेत.
'एक थी बेगम २' प्रेक्षकांना ३० सप्टेंबरपासून विनामूल्य पाहता येणार आहे, एमएक्स प्लेअरवर.
हेही वाचा - कीर्तनकार शिवलीला पाटील ‘या’ कारणासाठी गेल्या बिग बॉस मराठीच्या घराबाहेर!
