मुंबई - श्री स्वामी समर्थ अन्नछत्र मंडळ (ट्रस्ट), अक्कलकोट यांचा ३२ वा वर्धापन दिन आणि गुरुपौर्णिमा उत्सवाचे औचित्य साधून १६ जुलैला कार्यक्रमाचे आयोजन करण्यात आले आहे. "अक्कलकोट निवासी ब्रम्हांडनायकच्या प्रथम वर्षीय 'स्वामीरत्न राष्ट्रीय, स्वामीभूषण राज्य स्तरीय 'आणि 'स्वामी सेवक जिल्हास्तरीय' पुरस्कार वितरण समारंभात गायिका आशा भोसले यांना 'स्वामीरत्न राष्ट्रीय पुरस्कार २०१९' देऊन सन्मानित करण्यात येणार आहे.
या पुरस्काराचे स्वरूप रोख रक्कम ५ लाख, मानपत्र आणि सन्मानचिन्ह असे आहे. तर 'स्वामीभूषण राज्य पुरस्कार २०१९' अभिनेता स्वप्नील जोशी आणि ज्येष्ठ कवी व गीतकार श्री. ना. धों. महानोर यांना देण्यात येणार असून प्रत्येकी १ लाख २५ हजार रुपये आणि सन्मानचिन्ह असे या पुरस्काराचे स्वरूप असणार आहे.
२९ जुलै १९८८ला गुरूपौर्णिमेदिवशी श्री स्वामी समर्थ अन्नछत्र मंडळाची स्थापना झाली. त्यामुळे गुरूपौर्णिमा आणि वर्धापन दिन हा उत्सव या संस्थानमध्ये विशेषत्वाने साजरा केला जातो. या खास दिवसाचे औचित्य साधून धर्मकिर्तन व सांस्कृतिक कार्यक्रमाचे आयोजन ६ ते १५ जुलै दरम्यान करण्यात येणार असून यंदाचे हे विसावे वर्ष आहे.
