पुणे - स्वातंत्र्यदिनानिमित्त वंदे मातरम गीत नव्या स्वरूपात प्रसिद्ध करण्यात येणार असल्याची माहिती प्रसिद्ध गायिका सावनी रविंद्र हिने दिली आहे. पुणे श्रमिक पत्रकार संघाच्या वतीने गायिका सावनी रवींद्रचा वार्तालाप आयोजित करण्यात आला होता, यावेळी ती बोलत होती.
सावनी रविंद्र म्हणाली की, यापूर्वी विविध प्रकारचे गाण्यांचे अल्बम प्रकाशित झाले आहेत. मात्र, सध्या श्रोते स्वतंत्र गाणीदेखील पसंत करत आहेत. त्यामुळे मी स्वातंत्र्यदिनानिमित्त वंदे मातरम गीत नव्या चालीमध्ये प्रदर्शित करणार आहे.
नवीन गायकांसंदर्भात बोलताना ती म्हणाली, की सध्या समाज माध्यमांवर अनेक नवीन कलाकार त्यांची कला प्रदर्शित करत आहेत. मात्र, कलाकारांनी त्यांच्या गुरूंकडून शास्त्रशुद्ध पद्धतीने कला शिकल्यानंतरच अशाप्रकारे त्यांच्या कलागुणांचे प्रदर्शन केल्यास ते अधिक प्रभावी ठरेल. यावेळी बोलताना आपल्या यशात माध्यमांचा मोठा वाटा असल्याचे सावनीने म्हटले. कलाकारांना प्रसिद्धी मिळवून देण्याचे आणि त्यांचं काम सर्वांपर्यंत पोहचवण्याचे काम माध्यमे करत असल्याचंही तिनं यावेळी म्हटलं.
