‘आई माझी काळुबाई’ ही मालिका रसिकांच्या मनात घर करून राहिली आहे. आर्या हे मुख्य पात्र काळूबाईच्या आशीर्वादाने आयुष्यात उद्भवणाऱ्या आणि इतरांनी निर्माण केलेल्या संकटांचा सामना करीत असते. सुरुवातीला प्राजक्ता गायकवाड हे पात्र रंगवीत होती. निर्मितीसंस्थेबरोबर झालेल्या विवादात तिची जागा वीणा जगतापने घेतली. वीणाने या मालिकेच्या लोकप्रियतेत भर घातली परंतु प्रकृती अस्वास्थामुळे तिने ‘काळूबाई’ला राम राम केला. आता आर्याच्या भूमिकेत एक नवीन कलाकार दिसणार आहे.
‘आई माझी काळुबाई’ मालिकेत आता आर्याची भूमिका साकारणार आहे रश्मी अनपट. मराठी मालिकाविश्वातील लोभस चेहर्‍याची गोड अभिनेत्री म्हणून रश्मी अनपट हे नाव डोळ्यासमोर येतं. भूमिकेत जीव ओतून काम करणं आणि वेगळी ओळख निर्माण करणं, ही रश्मीच्या अभिनयाची खासियत. पुण्यात शालेय आणि महाविद्यालयीन शिक्षण घेताना झालेले नाट्यसंस्कार आणि ‘रायगडाला जेव्हा जाग येते’, ‘स्वभावाला औषध नाही’, ‘गाठीभेटी’ या नाटकांतल्या लक्षवेधी भूमिकांमुळे तिच्या अभिनयाचा पाया भक्कम झाला आहे. त्यामुळेच तिच्या प्रत्येक भूमिकेबाबत प्रेक्षकांना उत्सुकता असते.
लोकप्रिय युवा अभिनेता विवेक सांगळे याच्याबरोबर अलका कुबल-आठल्ये, शरद पोंक्षे, मिलिंद शिंदे, प्रसन्ना केतकर, संग्राम साळवी, अनिकेत केळकर, मंजूषा गोडसे, स्मिता ओक, प्राजक्ता दिघे, जान्हवी किल्लेकर, लीना दातार, पार्थ केतकर, शुभंकर एकबोटे या दमदार अभिनयसंपन्न कलाकारांबरोबर रश्मीचे 'आर्या' साकारणे हे या मालिकेचे वेगळेपण ठरेल.
रश्मी आता सोनी मराठी वाहिनीवरच्या अफाट लोकप्रियता लाभलेल्या 'आई माझी काळुबाई' या मालिकेत 'आर्या' ही मुख्य भूमिका साकारणार आहे. या मालिकेत सध्या विराटच्या आसुरी प्रभावाखाली असलेले पाटील विरुद्ध श्रद्धा-भक्तीचे पाठबळ असलेले पुरोहित कुटुंब यांच्यातला संघर्ष शिगेला पोहोचला आहे. मालिकेची लोकप्रियता लक्षात घेता या महतत्त्वाच्या टप्प्यावर रश्मीने साकारलेली आर्या प्रेक्षकांसाठी विशेष पर्वणी असेल.
'आई माझी काळुबाई' ही मालिका सोनी मराठी वाहिनीवर प्रसारित होते आणि २९ मार्च ते ३ एप्रिल दरम्यान एक तासाच्या विशेष भागांचे प्रसारण असणार आहे.
हेही वाचा - बहुप्रतिक्षित मराठी सिनेमा 'वेल डन बेबी'चा अमेझॉनवर खास प्रीमिअर
