मुंबई - बॉलिवूड अभिनेता रणबीर कपूर आणि कॅटरिना कैफ हे एकेकाळी रिलेशनशीपमध्ये होते. तब्बल ७ वर्षे एकमेकांना डेट केल्यानंतर त्यांचे ब्रेकअप झाले. ब्रेकअपनंतरही त्यांच्यात चांगली मैत्री आहे. दोघांनीही त्यानंतर आपल्या करिअरकडे लक्ष केंद्रीत केले. मात्र, अलिकडेच एका कार्यक्रमात कॅटरिनाने रणबीरबाबत एक खुलासा केला आहे.
कॅटरिना बऱ्याचदा सोशल मीडियावर सक्रिय असते. इन्स्टाग्रामवर तर ती नेहमी तिचे फोटो आणि व्हिडिओ शेअर करत असते. मात्र, २०१२ साली तिने पहिल्यांदा इन्स्टाग्रामवर अकाऊंट सुरू केले होते. यामध्ये तिला रणबीरनेच मदत केली होती. त्यानेच तिला इन्स्टाग्राम कसे वापरावे, हे शिकवले होते. मात्र, रणबीरचे स्वत:चे इन्स्टाग्राम अकाऊंट बनावट असल्याचे तिने सांगितले.
अरबाज खानच्या 'पिंच' या कार्यक्रमात तिने हा खुलासा केला आहे. अरबाजच्या या शोमध्ये बॉलिवूडचे अनेक कलाकार हजेरी लावत असतात. या कार्यक्रमातच त्याने तिला तिचे अकाऊंट फेक आहे का, असा प्रश्न विचारला होता. यावेळी तिने रणबीरसोबत ब्रेकअपनंतरचा काळ कसा होता, याबद्दलही संवाद साधला.
सध्या कॅटरिना तिच्या 'भारत' चित्रपटाच्या प्रमोशनमध्ये व्यग्र आहे. तर रणबीरही आलियासोबत 'ब्रम्हास्त्र' चित्रपटाच्या शूटिंगमध्ये व्यस्त आहे. कॅटरिनासोबत ब्रेकअप नंतर आता आलिया आणि रणबीरच्या नात्याच्या चर्चांना उधाण आले आहे. लवकरच ते लग्नगाठ बांधणार आहेत, असेही बोलले जात आहे.
