मुंबई - बॉलिवूड ‘क्वीन’ म्हणजेच कंगना राणावतचा आज ३२ वा वाढदिवस. कंगना सुरूवातीपासून अनेक वादांमुळे आणि आपल्या परखड बोलण्यामुळे चर्चेत असते. मात्र, हे जरी खरे असले तरी एका सामान्य मुलीला चित्रपटसृष्टीत पोहोचण्यासाठी आणि आपली ओळख निर्माण करण्यासाठी किती धडपड करावी लागते याचं उत्तम उदाहरण कंगना आहे. स्वबळावर तिने बॉलिवूडमध्ये आपली ओळख निर्माण केली आहे. तिने बरेच सुपरहिट चित्रपट बॉलिवूडला दिले आहेत. मात्र, त्यासोबतच काही चित्रपट नाकारले देखील आहेत. पुढे चालून हेच चित्रपट ब्लॉकबस्टर ठरले आहेत.
कंगनाने नाकारलेले चित्रपट
'द डर्टी पिक्चर'
या चित्रपटात सुरुवातीला विद्या बालनएवजी कंगनाला मुख्य भूमिकेसाठी विचारण्यात आले होते. मात्र, तिने हा चित्रपट नाकारला होता.
बजरंगी भाईजान
सलमान खान आणि करिना कपूर यांच्या 'बजरंगी भाईजान' चित्रपटासाठीही कंगनाला विचारण्यात आले होते. या चित्रपटाचे दिग्दर्शक कबीर खान यांनी कंगनाला या चित्रपटात मुख्य भूमिका देण्याचा निर्णय घेतला होता. मात्र, तिने हा चित्रपट नाकारला.
सुलतान
'सुलतान' चित्रपटात पुन्हा एकदा सलमान खानसोबत मुख्य भूमिकेसाठी कंगनाला विचारण्यात आले होते. मात्र, तारखांचे कारण देत तिने या चित्रपटाला नकार दिला होता.
एअरलिफ्ट
अक्षय कुमारच्या 'एअरलिफ्ट' चित्रपटातील भूमिकेसाठी कंगनाला प्रस्ताव पाठविण्यात आला होता. तिच्या नकारानंतर हा चित्रपट निमरत कौरला मिळाला.
संजू
दिग्दर्शक राजकुमार हिराणी यांच्या 'संजू' चित्रपटाने बॉक्स ऑफिसवर अनेक विक्रम मोडले. या चित्रपटातही संजय दत्तची पत्नी मान्यता हिची भूमिका साकारण्यासाठी कंगनाला कास्ट करण्याचा निर्णय घेण्यात आला होता. मात्र, कंगनाने हा चित्रपट देखील नाकारला होता.
