'तारक मेहता का उल्टा चश्मा' या टीव्ही मालिकेतील जेठालाल ही व्यक्तीरेखा देशातील घराघरात ओळखीची आहे. जेठालालची भूमिका करणारे अभिनेता दिलीप जोशी यांचा आज २६ मे रोजी वाढदिवस आहे. चित्रपट आणि टीव्हीच्या क्षेत्रात गेली ३ दशके त्यांचा वावर आहे. मात्र त्यांना लोकप्रिय व्हायला २००८ हे साल उजाडावे लागले.
'जेठालाल' आहेत लग्झरी गाड्यांचेही शौकीन
'जेठालाल'चे खरे आयुष्य ऐषोरामाचे आहे. दिलीप जोशी लग्झरी गाड्यांचेही शौकीन आहेत. त्यांच्याकडे ऑडी क्यू-७ आणि इनोव्हा सारख्या गाड्या आहेत.
'जेठालाल' बनल्यानंतर बदलले नशीब
२००८ मध्ये असित कुमार मोदी यांनी दिलीप जोशी यांना 'तारक मेहता का उल्टा चश्मा' मालिकेतील जेठालालच्या भूमिकेसाठी साईन केले आणि त्यांचे नशीब बदलले. आता दिलीप जोशींना सर्वजण जेठालाल या नावाने ओळखतात.
लोकप्रिय होण्यापूर्वी करावा लागला संघर्ष
दिलीप जोशी आज फिल्म आणि टीव्ही इंडस्ट्रीमध्ये प्रस्थापित आहेत. परंतु या स्थानापर्यंत पोहोचणे सोपे नव्हते. १९८९ मध्ये त्यांनी बॉलिवूडमध्ये पदार्पण केले. सलमान खान ते शाहरुख खान यांच्या सिनेमातूनही काम केले. ते जरी सुपरस्टारसोबत काम करीत होते मात्र त्यांना तशी भूमिका मिळत नव्हती. त्यामुळे आपल्यातील अभिनेता जीवंत ठेवण्यासाठी त्यांनी रंगमंचाचा आधार घेतला.
५० रुपये होती कमाई
दिलीप जोशी यांनी पडद्यामागील कलाकार म्हणूनही काम केले. या कामासाठी त्यांना रोज ५० रुपये कमाई मिळत होती. एका मुलाखतीत त्यांनी या गोष्टीचा खुलासा केला होता. ते नाटकांसाठी पंचलाईन आणि विनोद लिहित असत ज्याला प्रेक्षक उत्सफुर्त दाद देऊन जात.
सलमानसोबत 'मैंने प्यार किया'मध्ये केले होते पदार्पण
रंगमंचावर प्रवेश करण्यापूर्वी दिलीप जोशी यांची एन्ट्री थेट मोठ्या पडद्यावर झाली. त्यांनी 'मैंने प्यार किया' या चित्रपटातून रुपेरी पडद्यावर पदार्पण केले. यात सलमान नायक होता तर दिलीप जोशी नोकराच्या भूमिकेत होते. यात त्यांना एकही संवाद नव्हता. या सिनेमातून सलमान सुपरस्टार झाला मात्र दिलीप जोशींचा अभिनेता होण्यासाठीचा संघर्षही सुरू झाला.
या सिनेमातूनही झळकलेत 'जेठालाल'
'हम आपके हैं कौन' चित्रपटातील त्यांच्या भूमिकेला संवाद नव्हता, छोटा रोल होता मात्र त्याचेही कौतुक झाले आणि त्यांना काही भूमिका मिळत गेल्या. त्यानंतर दिलीप जोशी यांनी 'खिलाड़ी 420', 'वन 2 का 4', 'हमराज', 'फिराक', 'ढूंढते रह जाओगे' आणि 'वॉट्स युवर राशी' यासारख्या सिनेमातून भूमिका साकारल्या.
दिलीप जोशी हे २००८ पासून 'तारक मेहता का उल्टा चश्मा' शोचा अविभाज्य भाग आहेत. हा शो मिळाल्यानंतर त्यांनी दोन चित्रपटही केले. मात्र आज त्यांची खरी ओळख जेठालाल या व्यक्तीरेखेमुळेच आहे.
दर एपिसोड मानधन
आज दिलीप जोशी 'जेठालाल' बनून लाखो रुपये कमवत आहेत. मिळालेल्या माहितीनुसार 'तारक मेहता का उल्टा चश्मा'च्या प्रत्येक एपिसोडसाठी त्यांना दीड लाख रुपये मानधन म्हणून मिळतात.
हेही वाचा - काँग्रेस आमदारावर वांशिक टिपण्णी करणाऱ्या यु ट्यूबरवर वरुण धवनसह सेलेब्रिटींची टीका
