मुंबई - 'कलर्स' मराठी वाहिनीवरील 'सूर नवा ध्यास नवा' या कार्यक्रमातील सुरवीरांच्या गाण्यांनी अवघ्या महाराष्ट्राला तब्बल चारहून अधिक महिने मंत्रमुग्ध केले. त्यांच्या सुरांना संपूर्ण महाराष्ट्राने पसंती दिली. हे सुरवीर आता महाअंतिम सोहळ्यासाठी सज्ज झाले आहेत. सुप्रसिद्ध गायक 'पद्मश्री' हरिहरन यांच्या उपस्थितीत या कार्यक्रमाचा ग्रँड फिनाले पार पडणार आहे.
'सूर नवा ध्यास नवा' या कार्यक्रमाला महाराष्ट्रातील आणि जगभरातील प्रेक्षकांचे भरभरून प्रेम मिळाले. या सुरवीरांच्या सुरेल गाण्यांनी प्रेक्षकांचा आनंद द्विगुणीत झाला. महाअंतिम सोहळ्यामध्येही प्रेक्षकांना मनोरंजनाची मेजवानी मिळणार आहे हे निश्चित आहे. कारण आपल्या सुरांनी केवळ महाराष्ट्रातीलच नव्हे तर भारतातील व जगभरातील प्रेक्षकांच्या मनावर अधिराज्य करणारे पद्मश्री हरिहरन यांची खास उपस्थिती या कार्यक्रमात राहणार आहे.
महाअंतिम सोहळ्यामध्ये हरिहरन यांच्या आवाजात 'जोगवा' चित्रपटातील 'जीव दंगला' हे गाणे देखील ऐकायला मिळणार आहे. तर, अवधूत गुप्तेंचीही काही निवडक गाणी ऐकायला मिळणार आहेत.
सर्वांचा लाडका मॉनिटर हर्षदचीही धमाकेदार एन्ट्री पाहायला मिळणार आहे. तर, महाअंतीम सोहळ्यात पोहोचलेल्या स्पर्धकांचीही एकापेक्षा एक सरस गाणी या ग्रँड फिनालेमध्ये सादर होणार आहेत. २ फेब्रुवारीला या कार्यक्रमाचा ग्रँड फिनाले पार पडणार आहे.
