मुंबई - आपला देश आजही बहुतांशी गावांमध्ये वसतो. भली मोठी शहरे विकसित झाली असली तरी त्यांची पोटे गावांमुळेच भरली जातात, कारण आपल्या कृषिप्रधान देशातील ३ चथुर्तांश जनता शेती करते. शहरांमध्ये आयुष्य व्यतीत करणारे बरेचजण संधी मिळताच आपल्या मनः शांती मिळवण्यासाठी गावाकडे जातात. खरंतर काँक्रीट जंगलामध्ये राहिल्यावर गावाकडच्या हिरवळीची ओढ अजूनच वाढते. त्यातच जे परदेशात स्थायिक झालेत त्यांना तर आपला देश, आपलं गाव नेहमीच खुणावत असतं.
अशाच एका गावाची गोष्ट ‘सावधान, पुढे गाव आहे’ या चित्रपटातून सांगण्यात आली आहे. हा चित्रपट एक सामाजिक संदेशही देऊ पाहतो. प्रवास करताना शक्यतो प्रत्येकालाच ‘सावधान, पुढे गाव आहे’ अशी पाटी दिसलीच असेल. पुढे गाव आहे की गाव पुढे आहे या शक्यतांचा विचार दिग्दर्शकाने या सिनेमातून मांडण्याचा प्रयत्न केला आहे. नुकतंच या चित्रपटाचे पोस्टर सोशल मीडियावर प्रदर्शित करण्यात आले. या चित्रपटाच्या पोस्टरवर ‘सावधान, पुढे गाव आहे’ या पाटीवर गिधाड बसलेले दिसत आहे. त्यामुळे चित्रपटाच्या विषयात गूढताही असण्याची शक्यता आहे.
‘सावधान, पुढे गाव आहे’ या चित्रपटाचे दिग्दर्शन मुन्नावर शमीम भगत यांनी केले असून त्याची निर्मिती मीना शमीम फिल्म्सची आहे. चित्रपटातील कलाकारांची नावे अद्याप गुलदस्त्यातच ठेवण्यात आली आहेत.
