मुंबई - बॉलिवूडमधील आघाडीचे दिग्दर्शक संजय लिला भन्साळी हे रोमॅन्टिक चित्रपटांचे बादशाह मानले जातात. त्यांनी आजवर अनेक सुपरहिट चित्रपट बॉलिवूडला दिले आहेत. आता त्यांचा आणखी एक चित्रपट प्रेक्षकांच्या भेटीला येणार आहे. विशेष म्हणजे या चित्रपटात दोन नवे चेहरे मुख्य भूमिकेत पाहायला मिळणार आहेत. 'मलाल' असे या चित्रपटाचे नाव आहे. या चित्रपटाचा नुकताच ट्रेलर प्रदर्शित करण्यात आला आहे.
'मलाल' चित्रपटाचे फर्स्ट लूक पोस्टर प्रदर्शित केल्यानंतर चाहत्यांना ट्रेलरची फार काळ वाट पाहावी लागली नाही. लगेचच या चित्रपटाचा ट्रेलर प्रदर्शित करण्यात आला आहे. शर्मिन शेगल आणि मिझान जाफरी हे या चित्रपटातून पदार्पण करत आहेत. शर्मिन ही संजय लिला भन्साळींची बहिण बेला सेगल यांची मुलगी आहे. तर मिझान हा जावेद जाफरीचा मुलगा आहे.
सुरुवातीला नायक आणि नायिकेमध्ये असलेला वाद नंतर प्रेमात रुपांतरीत होतो. त्याला कशाप्रकारे राजकीय वळण मिळतं. याची झलक या ट्रेलरमध्ये पाहायला मिळते. प्रेमावर आधारित असलेल्या कथांमध्ये संजय लिला भन्साळी यांचा हातखंडा आहे. आता त्यांच्या इतर चित्रपटाप्रमाणे 'मलाल' चित्रपट देखील प्रेक्षकांना सिनेमागृहाकडे खेचून आणण्यात यशस्वी होतो का? हे पाहणे औत्सुक्याचे ठरणार आहे.
चित्रपट व्यापार विश्लेषक तरण आदर्श यांनी या चित्रपटाच्या ट्रेलरची लिंक शेअर केली आहे. संजय लिला भन्साळी यांच्यासह भूषण कुमार, महावीर जैन आणि क्रिशन कुमार यांनी या चित्रपटाची निर्मिती केली आहे. तर, मंगेश हाडवळे यांनी दिग्दर्शनीय धुरा सांभाळली आहे. येत्या २८ जुनला हा चित्रपट प्रेक्षकांच्या भेटीला येणार आहे.
