मुंबई - नेहमीज आपल्या वैविध्यपूर्ण भूमिकांनी प्रेक्षकांचे मनोरंजन करणारे ज्येष्ठ अभिनेते मोहन जोशी 'मिस यु मिस' या चित्रपटातून प्रेक्षकांच्या भेटीला येणार आहेत. 'मिस यु मिस' हे वाक्य आपण आपल्या जीवनात असलेल्या 'मिस'ची आठवण काढण्यासाठी वापरतो. मात्र, हे वाक्य नक्की कोण, कोणासाठी वापरत आहे? हे हा चित्रपट पाहिल्यावरच लक्षात येईल. या चित्रपटाचे पहिले पोस्टरही प्रदर्शित करण्यात आले आहे.
मोहन जोशी, तेजस्वी पाटील आणि नवोदित अभिनेता भाग्येश देसाई यांचा लूक या पोस्टरमध्ये पाहायला मिळतो. हे पोस्टर पाहून मोहन जोशींमध्ये असलेला चार्म किंचीतही कमी झाला नसून उलट या पोस्टरमध्ये ते अधिकच तरुण आणि हँडसम दिसतात.
हेही वाचा -'शहीद भाई कोतवाल' चित्रपटात ऋतुजा बागवे साकारणार 'ही' भूमिका
या सिनेमाचे दिग्दर्शन शाम निंबाळकर यांनी केले आहे. शाम निंबाळकर हे या चित्रपटाद्वारे मराठी सिनेसृष्टीत पदार्पण करत आहे. त्यांनी यापूर्वी हिंदी चित्रपटसृष्टीतील दिग्गज दिग्दर्शक अनिस बाझमी यांच्यासोबत रेडी, वेलकम, नो एन्ट्री, मुबारकां, वेलकम बॅक आदी चित्रपटांसाठी सहाय्यक दिग्दर्शक म्हणून काम केले आहेत.
जम्पिंग टोमॅटो मार्केटिंग प्रायव्हेट लिमिटेड प्रस्तुत, ग्रे कॅट प्रोडक्शन, आर. एस. महाडिक प्रोडक्शन आणि क्षमा एंटरटेनमेंट निर्मित 'मिस यु मिस' हा सिनेमा येत्या १७ जानेवारी रोजी प्रदर्शित होत आहे.
हेही वाचा -महिलांच्या जीवनातील संघर्षावर भाष्य करणारे नाटक 'बाई वजा आई'
सुनील रघुनाथ महाडिक, क्षमा हिप्परगेकर आणि रोहनदीप सिंग यांनी या सिनेमाची निर्मिती केली आहे. या सिनेमात मोहन जोशी, अश्विनी एकबोटे, तेजस्वी पाटील, भाग्येश देसाई आणि किशोर नांदोस्कर यांच्या प्रमुख भूमिका आहेत.
अश्विनी एकबोटे यांचा शेवटचा चित्रपट
अभिनेत्री अश्विनी एकबोटे यांचा हा अखेरचा चित्रपट आहे. एका कार्यक्रमादरम्यान त्यांचा हृदयविकाराच्या तिव्र झटक्यामुळे निधन झाले होते. त्यामुळे या चित्रपटाला एक भावनिक जोडही आहे.
हेही वाचा -मनीष वात्सल्य यांच्या 'स्कॉटलँड' चित्रपटाला ऑस्कर पुरस्कारासाठी नामांकन
