मुंबई - लहानग्यांच्या होड्यांना वाहून नेणारा खोडकर पाऊस. प्रियकर-प्रेयसीच्या आनंदात बरसणारा रिमझिम पाऊस. शेतकऱ्याला सुखावणारा समाधानकारक पाऊस.. तर, कधी गरजणारा घाबरवून सोडणारा बेताल पाऊस. अशी अनेकविध रूपांनी सजलेला हा पाऊस सगळ्यांनाच हवाहवासा वाटतो. आजही आबालवृद्धांच्या ओठी 'येरे येरे पावसा, तुला देतो पैसा' हे बालगीत रुळताना दिसलं की आपसूकच वातावरण एकदम रम्य होऊन जातं. पावसाच्या अनेकविध रूपांपैकी अशाच एका रूपावर 'येरे येरे पावसा' हा आगामी मराठी चित्रपट लवकरच प्रेक्षकांच्या भेटीला येणार आहे. या चित्रपटाचं पहिलं पोस्टरही प्रदर्शित करण्यात आलं आहे.
या चित्रपटातून पावसाची नेमकी कोणती बाजू पाहायला मिळणार, हे सध्या गुपित आहे. चित्रपटाचा कथाविषय मायबाप प्रेक्षकांसमोर आणण्यापूर्वी या चित्रपटाचे पोस्टर सोशल मिडियावर प्रदर्शित करण्यात आले आहे. खासकरून लहान मुलांमध्ये उत्कंठा वाढवणारे हे पोस्टर साऱ्यांच्याच पसंतीस पडले आहे.
हेही वाचा -'बॉईज'ना टक्कर द्यायला सिल्व्हर स्क्रीनवर 'गर्ल्स'ची एन्ट्री, टीझर प्रदर्शित
'येरे येरे पावसा' चित्रपटाचे संवाद अभिषेक संतोष जया करगुटकर यांचे आहेत. तर, ही कथा भूषण दळवी आणि शफाक खान यांनी लिहिली आहे. 'मिशन मंगल' फेम चंदन अरोरा हे हिंदीतील अनुभवी संकलक या चित्रपटाच्या निमित्ताने प्रथमच मराठीत काम करत आहेत. या चित्रपटाची निर्मिती एस.क्यूब फिल्म्स इंडिया एलएलपी आणि सहनिर्मिती बटरफ्लाय फिल्म्स यांची आहे. तर, दिग्दर्शन शफाक खान यांनी केलं आहे. पुढच्या वर्षी हा चित्रपट प्रदर्शित होईल.
हेही वाचा -'अग्निहोत्र'च्या मालिकेत कोणतं रहस्य असणार? दुसरा भाग पुन्हा 'स्टार प्रवाह'वर
