मुंबई - ‘जॉबलेस’ तरुणाच्या चुकीच्या निर्णयातून आयुष्य कसे उद्ध्वस्त होते हे ‘जॅाबलेस’ मधून केलेय अधोरेखित! कोरोना विषाणूचा आघात झाल्यावर संपूर्ण जगच थांबलं होतं. देशाच्या आर्थिक नाड्या आवळल्या गेल्या होत्या. सर्व व्यवसाय ठप्प झाल्यामुळे अनेकांच्या नोकऱ्या गेल्या आणि अजूनही ती परिस्थिती आटोक्यात आलेली नाहीये. कोरोना काळात अनेक जण ‘जॉबलेस’ झाले आणि जॉबलेस झालेल्या व्यक्तींच्या मानसिक अवस्थेवर आधारित एक वेब सिरीज आलीय जिचे नावसुद्धा ‘जॉबलेस’ आहे. या एका चुकीच्या निर्णयातून आयुष्य कसे उद्ध्वस्त होऊ शकते, हे दर्शविणारी ही वेबसिरीज लवकरच 'प्लॅनेट मराठी ओटीटी' वर येत आहे.
आयुष्य जगण्यासाठी माणसाच्या काही गरजा असतात आणि त्या पूर्ण करण्यासाठी पैसा हा लागतोच. आणि त्यासाठीच प्रत्येक व्यक्ती नोकरी, बिझनेस करतो. सर्व काही सुरळीत सुरु असताना काही कारणास्तव जॉब गेला किंवा बिझनेस ठप्प झाला तर अशा वेळी संपूर्ण आयुष्याचे गणितच बिघडून जाते. माणसाची मानसिक स्थिती ढासळू लागते आणि पैसे कमावण्याच्या नादात, उतावळेपणात अनेकदा चुकीचा निर्णयही घेतला जातो. 'जॉबलेस' या वेबसिरीज मध्ये सुव्रत जोशी, पुष्कर श्रोत्री प्रमुख भूमिकेत असून निरंजन पत्की दिग्दर्शक आहेत.
'जॉबलेस' बद्दल 'प्लॅनेट मराठी ओटीटी'चे प्रमुख, संस्थापक अक्षय बर्दापूरकर म्हणतात, ''कोरोनामुळे अनेक जणांच्या नोकऱ्या गेल्या आहेत. नोकरी गेल्याने अनेक जण तणावपूर्ण जीवन जगत आहेत आणि त्यातूनच मग चुकीचे पाऊल उचलले जाते. सद्यस्थितीवर आधारित ही वेबसिरीज आहे. हा ज्वलंत विषय 'प्लॅनेट मराठी ओटीटी' ने 'जॉबलेस' या वेबसिरीजमधून मांडण्याचा प्रयत्न केला आहे. एक चूक सावरताना हातून अनेक चुका होतात आणि संपूर्ण आयुष्य बदलून जाते. या कठीण परिस्थितीवर भाष्य करणारी ही वेबसिरीज आहे. यातून प्रेक्षकांना नक्कीच काहीतरी बोध मिळेल.”
दोघांचेही पहिलेच वेब पदार्पण 'जॉबलेस'चा ट्रेलर सोशल मिडीयावर प्रदर्शित झाला असून महामारीच्या कठीण काळात सुव्रत 'जॉबलेस' का होतो, पैसे मिळवण्यासाठी तो वाईट मार्गाचा अवलंब करतो का, या अडचणीतून तो बाहेर येतो का, असे अनेक अनुत्तरित प्रश्न 'जॉबलेस'मधून उलगडणार आहेत.
हेही वाचा - HBD : डॉक्टरच्या प्रेमात पडल्या होत्या वैजयंती माला, लग्नानंतर सोडली चित्रपटसृष्टी
