मुंबई - मार्व्हल चाहत्यांची उत्सुकता शिगेला नेणारा 'अॅव्हेंजर्स एन्डगेम' अखेर चित्रपट गृहात दाखल झाला. प्रदर्शनापूर्वीच अनेक विक्रम मोडणाऱ्या या चित्रपटाने भारतातही छप्परफाड कमाई केली आहे. दोनच दिवसात या चित्रपटाने १०० कोटींची कमाई केली आहे. या चित्रपटाने 'बाहुबली' चित्रपटालाही मागे टाकले आहे.
अॅव्हेंजर ऐन्डगेम'ने भारतात पहिल्याच दिवशी ५३.१० कोटींचा कमाई केली होती. तब्बल २८४५ स्क्रिन्सवर हा चित्रपट झळकला. समीक्षकांनी या चित्रपटावर चांगल्या प्रतिक्रीया दिल्या आहेत. बॉक्स ऑफिसवर अॅव्हेंजर ऐन्डगेम' कमाईच्या बाबतीत त्सुनामी लाट ठरेल, असे चित्रपट समीक्षक तरण आदर्श यांनी आपल्या ट्विटमध्ये म्हटले आहे. बॉलिवूड कलाकारांकडुनही या चित्रपटावर चांगल्या प्रतिक्रिया येत आहेत. अक्षय कुमारने त्याच्या कुटुंबासोबत जाऊन हा चित्रपट पाहिला. तर सिद्धार्थ मल्होत्रादेखील हा चित्रपट पाहून भावूक झाल्याचे पाहायला मिळाले.
'अॅव्हेंजर्स एन्डगेम' या सिनेमात रॉबर्ट डाउनी जूनियर, क्रिस इवांस, मार्क रफेलो, क्रिस हेम्सवर्थ, स्कारलेट जोहानसन, जेरेमी रेनर, पॉल रड आणि ब्री लार्सन यांसारख्या कलाकारांच्या महत्त्वपूर्ण भूमिका आहेत. आता हा चित्रपट आणखी किती कमाई करतो, हे पाहणे औत्सुक्याचे ठरणार आहे.
