मुंबई - भारतीय महिला हॉकी टीमची प्रेरणादायक गोष्ट सांगणाऱ्या 'चक दे इंडिया' या चित्रपटाला १२ वर्षे पूर्ण झाली आहेत. किंग खान शाहरुख आणि त्याच्यासोबत भूमिका साकारणाऱ्या १० ही मुलींची भूमिका चाहत्यांच्या पसंतीस उतरली होती. अतिशय प्रेरणादायी कथानक असलेला हा चित्रपट आजही चाहत्यांच्या मनावर राज्य करतो.
हा चित्रपट का पाहावा याची बरीच कारणं आहेत. मात्र, शाहरुखने साकारलेल्या 'कबिर खान' या पात्राकडून मात्र, बरंच काही शिकण्यासारखं आहे.
परिस्थितीचा सामना करणं -
शाहरुखने साकारलेल्या 'कबीर खान'वर त्याची कोणतीही चूक नसताना 'देशद्रोही'चा आरोप लागलेला असतो. हा आरोप खोडून काढण्यासाठी तो काहीही करण्यासाठी तयार असतो. जेव्हा त्याला भारतीय महिला संघाच्या प्रशिक्षकाची संधी मिळते, तेव्हा तो त्याच्यावर लागलेला कलंक विसरुन नव्या जोमाने भारतीय संघासाठी प्रयत्न करतो. त्यामुळे परिस्थितीचा सामना करणं हा धडा त्याच्याकडून शिकायला मिळतो.
ताकद हिच एकता -
सुरुवातीला वेगवेगळ्या भागातून आलेल्या महिला एकमेकींशी जुळवून घेत नाहीत. मात्र, जेव्हा त्या एकत्र येऊन संघासाठी खेळतात, तेव्हा खरी एकता पाहायला मिळते.
महिला सशक्तीकरण -
चित्रपटात भारतीय महिला खेळांडूंबद्दल कोणालाही फारशी अपेक्षा नसल्याचं दाखवण्यात आलं आहे. महिलांच्या संघाला कोण प्रशिक्षण देणार, अशीही मानसिकता यामध्ये पाहायला मिळते. मात्र, 'कबीर खान' हा महिला सशक्तीकरणाला प्राधान्य देत त्यांना प्रशिक्षण देतो.
अहंकार बाजूला ठेवा -
एकमेकांशी स्पर्धा करताना नकळत आपल्या मनात गर्वाचे घर तयार होत असते. मात्र, जेव्हा आपण एकत्र येऊन संघासाठी लढत असतो, तेव्हा आपल्यातला अहंकार बाजूला ठेवून एकमेकांसाठी लढता आलं पाहीजे, हा धडा देखील या चित्रपटातून मिळतो.
एक प्रशिक्षक तुम्हाला प्रशिक्षणासोबतच खूप काही शिकवतो -
'चक दे इंडिया मधील' 'कबीर खान' हा प्रत्येक व्यक्तीसाठी प्रेरणा ठरतो. कठीण परिस्थितीतही तो स्थिर असतो, हा गुण सर्वांना उपयोगी पडेल.
आश्वासक बना -
जर एखादी चांगली गोष्ट करण्याची तुम्हाला भीती वाटत असेल, तर ती पूर्ण करणं अवघड ठरतं. त्यामुळे आपल्यातला आत्मविश्वास जागृत करुन आश्वासक बनुन काम करा.
स्थिर राहा -
चित्रपटाचा क्लायमॅक्स आपल्याला स्थिर राहायला शिकवतो.
विश्वास ठेवा -
चित्रपटाच्या शेवटी एकमेकींवर विश्वास ठेवल्यामुळेच भारतीय हॉकी संघ विजय मिळवतो. त्यामुळे विश्वासाचा धडादेखील या चित्रपटातून मिळतो.
कठीण परिस्थिशी लढा -
या चित्रपटात जेव्हा कोरिया आणि अर्जेंटीनाविरोधात लढत होते, तेव्हा राखेतून भरारी घेतलेल्या फिनिक्स पक्षाप्रमाणे भारताची परिस्थिती निर्माण होते. त्यामुळे कठीण परिस्थिती हार न मानता लढत राहा, हा धडा मिळतो.
योग्य दिशा ठरवणे -
एक कल्पना कशाप्रकारे खेळ बदलवतो. त्यामुळे आपली नेमकी दिशा ठरवा, हा देखील धडा मिळतो.
तुम्हीच तुमच्या यशाचे शिल्पकार -
शेवटी आपणच आपल्या यशासाठी कारणीभूत असतो. त्यामुळे आत्मविश्वासाने कोणत्याही परिस्थितीशी दोन हात करुन आपल्या यशापर्यंत पोहोचा, हा देखील संदेश या चित्रपटातून आपल्याला मिळतो.
