मुंबई - सलमान खान आणि कॅटरिना कैफ यांच्या मुख्य भूमिका असलेला भारत चित्रपट प्रदर्शनाच्या मार्गावर आहे. अशातच चित्रपटातील नवनवीन गाणी प्रेक्षकांच्या भेटीला येत आहेत. चित्रपटातील इतर गाण्यांना मिळालेल्या प्रेक्षकांच्या प्रतिसादानंतर आता 'तुर्पेया' हे गाणं प्रदर्शित करण्यात आलं आहे.
सलमान खानने आपल्या सोशल मीडिया अकाऊंटवरून हे गाणं शेअर केलं आहे. कामासाठी गेलेल्या मात्र अजूनही गावच्या मातीशी नाळ जुळलेल्या भारतची कथा या गाण्यात पाहायला मिळते. मै तुर्पेया घर से दूर, असे या गाण्याचे शीर्षक असून सलमान यात नेव्ही ऑफिसरच्या वेशभूषेत दिसत आहे.
या गाण्याला विशाल-शेखर यांनी आवाज दिला आहे. दरम्यान याआधी चित्रपटातील 'स्लो मोशन', 'जिंदा', 'चश्नी' आणि 'अैथे आ'सारखी अनेक गाणी प्रदर्शित करण्यात आली होती. अली अब्बास जफर यांचे दिग्दर्शन असलेला 'भारत' चित्रपट येत्या ५ जूनला प्रदर्शित होणार आहे.
