मुंबई - शहरातील लाखो कामगार सिनेसृष्टीत पडद्याआड काम करत असतात. नुकतीच राज्य सरकारने चित्रपट मालिकांच्या चित्रीकरणास परवानगी दिली आहे. त्यामुळे, या कामगारांच्या सुरक्षिततेसाठी 5 लाख रुपयांचे विमा कवच द्यावे, अशी मागणी फेडरेशन ऑफ वेस्टर्न इंडिया सिने एम्प्लॉयीज संघटनेने मुख्यमंत्र्यांकडे केली आहे. याबद्दलची माहिती संघटनेचे अध्यक्ष बी.एन. तिवारी यांनी दिली.
कामगार आणि टेक्निशियन यांची सर्वात मोठी आणि जुनी संघटना असलेल्या फेडरेशन ऑफ वेस्टर्न इंडिया सिने एम्प्लॉयीजने कामगारांच्या सुरक्षा उपाययोजनांबाबतही सूचना केल्या आहेत. चित्रीकरण करणारे 80 टक्के कामगार हे आपल्या गावी गेले आहेत. मात्र, जे मुंबईत आहेत त्यांना आणि इतर कामगारांना अनेक चित्रपटसृष्टीतील दिग्गजांनी आर्थिक मदत केली आहे. आता चित्रीकरण सुरू करण्यासाठी कामगारांची आवश्यकता भासणार आहे, त्यामुळे, त्यांना परत आणण्यासाठीचे प्रयत्न सुरू असल्याचे तिवारी यांनी सांगितले.
फेडरेशन ऑफ वेस्टर्न इंडिया सिने एम्प्लॉयीजने केलेल्या मागण्या -
लॉकडाऊन संपल्यावर सर्व कर्मचाऱ्यांची सेटवर येण्यापूर्वी वैद्यकीय तपासणी करावी. चित्रीकरण पूर्ण होईपर्यंत प्रवास आणि इतरांचा संपर्क टाळण्यासाठी सर्व सेटवरील कर्मचाऱ्यांची राहाण्याची सोय जवळील हॉटेल किंवा चित्रीकरणाच्या स्टुडिओच्या परिसरात करावी. सर्व कर्मचाऱ्यांना आवश्यक स्वच्छता सुविधा द्याव्यात. हेअरड्रेसर आणि मेकअप मॅनने एकदा वापरलेल्या ब्रशची योग्य विल्हेवाट लावावी. कमीतकमी कर्मचाऱ्यांना घेऊन अंतर्गत चित्रीकरण करावं आणि पोषक आहार त्यांना उपलब्ध करून द्यावा. चित्रीकरणानंतर सर्व उपकरणे सॅनिटाइज करावी. रोजंदारीवर काम करणाऱ्यांना रोज व इतरांना चित्रीकरण झाल्यावर लगेच कामाचे पैसे द्यावेत.
