मुंबई - अभिनेत्री दिशा पटानी लवकरच सलमानच्या बहुचर्चित 'भारत' चित्रपटात झळकणार आहे. काही दिवसांपूर्वीच या चित्रपटातील 'स्लो मोशन' गाणं प्रदर्शित झालं. या गाण्यातील सलमान आणि दिशाची केमिस्ट्री प्रेक्षकांच्या विशेष पसंतीस उतरली. या गाण्याला मिळालेला प्रतिसाद पाहता ही जोडी आता किक २ चित्रपटात एकत्र झळकणार असल्याचे वृत्त समोर येत होते.
याबद्दल दिशाला एका मुलाखतीत विचारले असता या बातम्या अद्याप तरी केवळ अफवा असल्याचे दिशाने म्हटले आहे. यासोबतच तुम्ही लोक साजिद नाडियादवाला सरांशी बोला, ते तुमचं ऐकतील अशी मला आशा असल्याचे दिशाने हसत म्हटले आहे. तर सलमानसोबत काम करण्याच्या अनुभवाबद्दल विचारले असता सलमानसोबतची आपली जोडी प्रेक्षकांच्या पसंतीस उतरत आहे, ही माझ्यासाठी खूप आनंदाची गोष्ट असल्याचे दिशाने म्हटले आहे.
दरम्यान दिशा सध्या आपल्या आगामी चित्रपटाच्या चित्रीकरणासाठी मॉरिशसमध्ये आहे. मलंग असे या चित्रपटाचे नाव असून या चित्रपटात ती आदित्य रॉय कपूरच्या अपोझिट झळकणार आहे. तर येत्या ५ जूनला म्हणजेच ईदच्या दिवशी सलमानचा भारत चित्रपट प्रेक्षकांच्या भेटीला येणार आहे.
