गेल्या वर्षीच्या कर्दनकाळातून सिनेसृष्टी उभारी घेत असताना आता पुन्हा कोवीड-१९ च्या रुग्णसंख्येत वाढ होताना दिसत आहे. ही सर्वांसाठीच चांगली बातमी नाहीये. परंतु गोष्टी नॉर्मल होत असताना सिनेमासंदर्भातील अनेक गोष्टींचे नियोजन करण्यात आले होते. काही दिवसांपूर्वीच श्री कृपा प्रॅाडक्शन निर्मित 'बाबू' या चित्रपटाचे पहिले पोस्टर प्रदर्शित करण्यात आले होते त्यामुळे ‘बाबू’ बद्दलची उत्सुकता वाढली होती. त्या अनुषंगाने ‘बाबू’ चित्रपटाच्या चित्रीकरणासाठी नारळ वाढविण्यात आला आणि ‘बाबू’ कोण यावरही प्रकाश टाकण्यात आला. यावेळी या सिनेमातील ‘बाबू’ च्या लूकचे नवीन पोस्टरदेखील प्रदर्शित करण्यात आले.
नुकताच ‘बाबू’ या सिनेमाचा मुहूर्त मुंबईमध्ये संपन्न झाला. चित्रपटाच्या पोस्टरमधील खळखळणाऱ्या समुद्रात डौलात उभ्या असलेल्या बोटीमध्ये रांगड्या शरीराच्या, ऐटीत उभ्या असलेल्या तरुणाने सर्वांचेच लक्ष वेधून घेतले होते. हा तरुण नक्की कोण आहे असा प्रश्न रसिकांना पोस्टर पाहून पडला होता. आता मात्र प्रेक्षकांची उत्सुकता फार न खेचता या तरुणाचे नाव जाहीर करण्यात आले आहे. हिंदी मनोरंजनसृष्टीत आघाडीवर असलेला हँडसम आणि डॅशिंग अभिनेता अंकित मोहन 'बाबू' या सिनेमात मुख्य भूमिका साकारणार आहे. या पोस्टरमध्ये अतिशय हुल्लडबाजी अंदाजात दिसणारा अंकित भाव खाऊन जात आहे. अंकितच्या या लूकने अभिनेत्याबद्दल असलेली प्रेक्षकांची उत्सुकता तर कमी केली, मात्र त्याचा हा लुक पाहून आता सिनेमाबद्दल प्रेक्षकांची उत्सुकता अधिकच वाढली आहे. अंकित हा मराठी प्रेक्षकांसाठी नवीन नाही. त्याने यापूर्वी अनेक मोठ्या आणि गाजलेल्या ‘फतेहशिकस्त’ सारख्या ऐतिहासिक मराठी चित्रपटांमध्ये काम केले आहे. शिवाय अंकित हा हिंदी मालिकांमधील लोकप्रिय अभिनेता आहे.
मुहूर्तावेळी अंकित मोहन बरोबर गायत्री दातार, रुचिरा जाधव, दिग्दर्शक मयूर मधुकर शिंदे, निर्माता बाबू के. भोईर यांच्यासह चित्रपटाची संपूर्ण टीम हजर होती.हेही वाचा -
हिंदी-मराठी मनोरंजनसृष्टी गाजविणाऱ्या अच्युत पोतदार यांना झी मराठीने प्रदान केला जीवनगौरव पुरस्कार!
