भोपाळ - मध्य प्रदेशातील राजकारणी आणि सरकारी अधिकाऱ्यांना लक्ष्य करत, 'हनीट्रॅप'मध्ये गुंतवल्याच्या आरोपाखाली पाच महिला आणि एका पुरुषाला अटक करण्यात आली होती. या अटकेच्या काही दिवसानंतर, आज आरोपींपैकी एकीने आपल्या गुन्ह्याची कबूली दिली आहे.
मिळालेल्या माहितीनुसार, यामधील आरोपींपैकी एकीने, २ वर्षांपूर्वी भोपाळमध्ये या सत्राची सुरुवात केल्याची कबूली दिली. हनीट्रॅप प्रकरणात एक संपूर्ण टोळी कार्यरत असल्याचा खुलासादेखील तिने केला. दरम्यान, या आरोपीच्या कुटुंबीयांनी असे म्हटले आहे, की अभ्यासाच्या बहाण्याने जबरदस्ती तिला या जाळ्यात ओढले गेले होते.
इंदौरमधील एका आयएमसी अभियंत्याने केलेल्या तक्रारीनंतर हे हनीट्रॅप प्रकरण समोर आले होते. एक टोळी आपल्याला ब्लॅकमेल करत असल्याची तक्रार या अभियंत्याने केली होती.
आरोपीकडून मिळालेल्या माहितीनुसार, हे रॅकेट एक ४८ वर्षीय महिला चालवत होती. महिलांना यामध्ये ओढून घेण्यासाठी ती एनजीओ चालवत असल्याचे दाखवत.
हेही वाचा : त्रिपुरामध्ये १० नराधमांचा रुग्णालयामधून परतणाऱ्या महिलेवर सामूहिक बलात्कार
