इस्रायलमध्ये वर्षभरात तिसऱ्यांदा सार्वत्रिक निवडणुका होणार?

इस्रायलच्या संसदेची सदस्यसंख्या १२० असून बहुमतासाठी यापैकी ६१ जागा आवश्यक आहेत. मात्र, या दोन्ही पक्षांचे नेते कोणाचाही पाठिंबा मिळवू शकलेले नाहीत. यामुळे मार्च २०२० मध्ये पुन्हा निवडणुका होण्याचे चित्र निर्माण झाले आहे.

तेल अवीव - इस्रायलमध्ये कोणताच पक्ष सरकार स्थापन करू शकत नसल्याची स्थिती वर्षभरात तिसऱ्यांदा निर्माण झाली आहे. ज्यू लोकांच्या या देशातील सर्वांत ताकदवान असणाऱ्या दोन पक्षांमध्ये काट्याची टक्कर असल्याने देश तिसऱ्यांदा सार्वत्रिक निवडणुकांच्या उंबरठ्यावर आहे.

इस्रायलचे सध्याचे काळजीवाहू पंतप्रधान बेंजामिन नेतान्याहू यांचा लिक्युड पार्टी हा उजवा पक्ष आणि त्यांचे मुख्य प्रतिस्पर्धी बेन्नी गँटझ यांचा ब्लू अँड व्हाईट अलायन्स या मध्यम विचारांच्या पक्ष निवडणुकांमध्ये बहुमत मिळवू शकलेले नाहीत. तसेच, युती सरकार तयार करण्यासाठी इतर पक्षांशी कोणताही समझोता करण्यातही अपयशी ठरले आहेत. यामुळे ही स्थिती निर्माण झाली आहे. बेन्नी गँटझ हे इस्रायल माजी लष्करप्रमुख आहेत.

इस्रायलच्या संसदेची सदस्यसंख्या १२० असून बहुमतासाठी यापैकी ६१ जागा आवश्यक आहेत. मात्र, या दोन्ही पक्षांचे नेते कोणाचाही पाठिंबा मिळवू शकलेले नाहीत. यामुळे मार्च २०२० मध्ये पुन्हा निवडणुका होण्याचे चित्र निर्माण झाले आहे. याआधी २०१९ मध्ये एप्रिल आणि सप्टेंबरमध्ये निवडणुका झाल्या होत्या. नेतान्याहू यांना निवडणुकीत त्यांचे प्रतिस्पर्धी गँटझ यांच्याकडून कडव्या संघर्षाचा सामना करावा लागत आहे. गँटझ यांनी चांगली कामगिरी करत सप्टेंबरमधील निवडणुकांमध्ये सर्वाधिक जागा जिंकल्या होत्या. मात्र, त्यांना सरकार स्थापन करण्यात अपयश आले होते.

काळजीवाहू पंतप्रधान बेंजामिन नेतान्याहू

नेतान्याहू सध्या ७० वर्षांचे आहेत. त्यांच्यावर अनेक गंभीर गुन्ह्यांचे आरोपही झाले आहेत. त्यांची लाचखोरी, आर्थिक गैरव्यवहार आणि विश्वासाचा भंग अशी तीन प्रकरणांमध्ये चौकशी सुरू आहे. तेव्हा निवडमुकीच्या प्रचारासोबतच त्यांना या चौकशीलाही सामोरे जावे लागणार आहे. याशिवाय, त्यांना स्वतःच्याच पक्षातून अनेक आव्हानांचा सामना करावा लागत आहे. त्यांना त्यांच्या पक्षाचे नेतृत्व सिद्ध करण्यासाठी २६ डिसेंबरला अंतर्गत निवडणुकीचा सामना करावा लागणार आहे. यामध्ये ते यशस्वी ठरले तर ते दशकाहून अधिक काळासाठी पक्षनेतेपदी राहतील.

माजी संरक्षण मंत्री अ‌ॅव्हिडॉर लिबरमन

दरम्यान, माजी संरक्षण मंत्री अ‌ॅव्हिडॉर लिबरमन यांनी या दोन्ही दिग्गज नेत्यांवर तोंडसुख घेतले आहे. त्यांनी या दोन्ही नेत्यांवर जराही जडजोडीस तयार नसल्याचा आरोप केला आहे. निदान देशाच्या हितासाठी या नेत्यांनी आपापसांतील झगडे विसरून एकत्र यावे आणि राजकीय कोंडी फोडावी, असे लिबरमन यांचे म्हणणे आहे. नेसेट येथे झालेल्या बैठकीत या दोन्ही नेत्यांना युती सरकार नको असल्याचा आरोपही त्यांनी केला.

लिबरमन यांच्या यिस्रायल बिटीनू पार्टीला सप्टेंबरमध्ये झालेल्या निवडणुकीत ८ जागा मिळाल्या होत्या. मात्र, त्यांनी नेतान्याहू किंवा गँटझ यांना पाठिंबा देण्यास नकार दिला होता.