नवी दिल्ली - जगभरामध्ये काल (शुक्रवार) कोरोनाच्या संसर्गामुळे १ हजार ६२७ जणांचा मृत्यू झाला. इटलीमध्ये काल एका दिवसात तब्बल ७९३ जणांचा मृत्यू झाला. आतापर्यंत एका दिवसात झालेल्या बळींचा हा उच्चांक होता. इटलीमध्ये आतापर्यंत सर्वाधिक ४,८२५ बळी गेले असून, चीनमध्ये एकूण ३,२५५ जणांचा यामुळे मृत्यू झाला आहे. तसेच, बरे होणाऱ्यांची संख्या ९५ हजारांच्या पुढे आहे.
जगभरामध्ये कोरोनामुळे १३ हजारांपेक्षा जास्त नागरिकांचा मृत्यू झाला आहे. स्पेन, जर्मनी, अमेरिका आणि फ्रान्समध्ये कोरोनाच्या रुग्णांची आणि बळींची संख्या वाढतच आहे. काल दिवसभरात स्पेन, जर्मनी, अमेरिका आणि फ्रान्समध्ये अनुक्रमे २८८, १६, ४६, ११२ जणांचा मृत्यू झाला आहे. जगभरामध्ये कोरोनाची दहशत पसरली आहे. भारतामध्ये आतापर्यंत ३४२ जणांना कोरोनाची लागण झाली आहे. तर ५ हजारांहून अधिक नागरिकांना देखरेखीखाली ठेवण्यात आले आहे.
कोरोनामुळे जगभरातील जनजीवन विस्कळीत झाले आहे. अनेक देशांनी आपल्या विमान सेवा बंद ठेवल्या असून नागरिकांवर निर्बंध लादले आहेत. सार्वजनिक ठिकाणे बंद ठेवण्यात आली आहेत. त्यामुळे आंतरराष्ट्रीय व्यापारावरही परिणाम झाला आहे. युरोपमध्ये आता कोरोनाने सर्वात जास्त थैमान घातले आहे. तर चीनमध्ये संसर्गाचे प्रमाण घटले आहे. जगभरातील सुमारे १६० देशांमध्ये कोरोनाचा विषाणू पसरला आहे.
हेही वाचा : LIVE JANTA CURFEW : देश थांबला.. मुंबई लोकलसह सर्व रेल्वे सेवा ३१ मार्चपर्यंत बंद
