वॉशिंग्टन : चीनच्या विषाणूशास्त्रज्ञ ली-मेंग यॅन यंनी कोरोना विषाणूच्या उगमाबाबत शंका उपस्थित केली होती. त्यानंतर त्यांना चीनमधून निघून जाण्यास सांगण्यास आले होते. कोरोना विषाणू हा चीनमधील प्रयोगशाळेमध्ये तयार करण्यात आल्याचे यॅन यांचे मत होते. अमेरिकेतील एका मुलाखतीमध्ये यॅन यांनी आता पुन्हा एकदा हा दावा केला आहे.
जागतिक आरोग्य संघटना आणि चीन सरकारनेही यॅन यांचा यापूर्वीचा दावा फेटाळून लावला होता. या नव्या मुलाखतीत यॅन म्हणतात, की चिनी लष्कराच्या प्रयोगशाळेत झोऊशान बॅट कोरोनाव्हायरस, झेडसी४५ आणि झेडएक्स२१ हे विषाणू तयार करण्यात आले होते. याबाबत त्यांचा वैद्यकीय अहवाल त्या लवकरच प्रकाशित करणार असल्याचेही त्यांनी या मुलाखतीत सांगितले. चीनच्या लष्करानेच हा विषाणू तयार केल्याचा दावा यॅन यांनी यापूर्वी ताईवान न्यूज या वृत्तवाहिनीला दिलेल्या मुलाखतीतही केला होता, ज्यानंतर त्यांना चीनमधून बाहेर काढण्यात आले होते.
यापूर्वी, जुलैमध्ये एका स्पॅनिश दैनिकाला दिलेल्या मुलाखतीत यॅन यांनी आपण आपल्या दाव्याला सिद्ध करणारे पुरावे गोळा करत असल्याचे म्हटले होते. तर ब्रिटनमधील एका वृत्तसंस्थेला दिलेल्या मुलाखतीत त्या म्हणाल्या होत्या, की या विषाणूच्या जीनोमची संरचना एखाद्या बोटाच्या ठशाप्रमाणे आहे. यावरुनच आपल्याला बरेच काही समजू शकते. हा विषाणू चीनच्या प्रयोगशाळेतच तयार झाला असून, हे मी जगासमोर मांडणार आहे.
जॉन्स हॉपकिन्स विद्यापीठाच्या आकडेवारीनुसार, जगभरात कोरोना रुग्णांची संख्या २८.६ दशलक्ष झाली असून, आतापर्यंत ९ लाख १८ हजार रुग्णांचे बळी गेले आहेत.
हेही वाचा : चीनचा पलटवार: अमेरिकेच्या राजनैतिक अधिकाऱ्यांवर लादली बंधने
