वॉशिंग्टन : भारताने ५९ चिनी अ‌ॅप्स बॅन केल्यानंतर, आता अमेरिकादेखील तसेच पाऊल उचलण्याचा विचार करत आहे. देशाचे सेक्रेटरी ऑफ स्टेट माईक पॉम्पेओ यांनी याबाबत माहिती दिली.
देशाची सुरक्षा, सायबर सुरक्षा आणि सार्वभौमत्वाला धोका निर्माण होऊ नये, यासाठी भारत सरकारने गेल्याच आठवड्यात चीनच्या ५९ अ‌ॅप्सना बॅन केले होते. यामध्ये लोकप्रिय अशा टिकटॉक, यूसी ब्राऊझर आणि वुईचॅटचाही समावेश होता.
भारताने या अ‌ॅप्सवर बंदी घातली आहे, तसेच ऑस्ट्रेलियाही असे करण्याचा विचार करत आहे. त्यामुळेच, राष्ट्राध्यक्ष डोनाल्ड ट्र्म्प आणि मी गांभीर्याने याबाबत चर्चा करत आहोत, अशी माहिती पॉम्पेओ यांनी एका वृत्तवाहिनीला दिलेल्या मुलाखतीमध्ये सांगितली.
आम्ही बऱ्याच काळापासून याबाबत चर्चा करत आहोत. याआधीही आम्ही हुवेई, आणि त्याची पॅरेंट कंपनी असलेल्या झेडटीई कंपनीलाही अमेरिकेबाहेर काढले आहे. त्याचप्रमाणे आम्ही याबाबतही नक्कीच कारवाई करु. याहून अधिक माहिती मी याठिकाणी देऊ शकत नाही, असे ते पुढे म्हणाले.
अमेरिकेतील नागरिकांनाही आपली खासगी माहिती चीनच्या सरकारला द्यायची नसेल, तर त्यांनी टिकटॉक आणि तत्सम अ‌ॅप्सचा वापर करताना काळजी बाळगणे गरजेचे असल्याचे ते म्हणाले.
हेही वाचा : 'कोव्हॅक्सिन'च्या क्लिनिकल चाचणीसाठी हैदराबादमध्ये नोंदणी सुरू..
