वॉशिंग्टन डी.सी.(सांता मोनिका) - जॉर्ज फ्लॉइड या कृष्णवर्णीय व्यक्तीचा मृत्यू झाल्यानंतर संपूर्ण अमेरिकेत मोर्चे सुरू झाले आहेत. जॉर्ज फ्लॉइड आणि आत्तापर्यंत हत्या झालेल्या आफ्रिकन अमेरिकन नागरिकांच्या स्मरणार्थ शेकडो सर्फर्सनी 'द इंक वेल' येथे जमा होत श्रद्धांजली वाहिली.
जीवन साजरा करण्याची आणि जवळच्या व्यक्तीच्या मृत्यूबद्दल शोक करण्याची एक 'पॅडल आउट' नावाची एक हवाईयन परंपरा आहे. 'ब्लॅग गर्ल सर्फ' नावाच्या सर्फीग संस्थेने या कार्यक्रमाचे आयोजन केले होते. या श्रद्धांजली कार्यक्रमात २०० पेक्षा जास्त सर्फर्सनी सहभाग घेत सर्फिंग केले. समुद्राच्या लांटावर स्वार होत त्यांनी जॉर्ज फ्लॉइडचे स्मरण केले.
जॉर्जला अटक करत असताना, एक पोलीस अधिकाऱ्याने त्याच्या मानेवर 8 मिनिटे 48 सेंकद गुडघा ठेवला होता. जॉर्ज त्याला तो गुडघा काढण्यासाठी आर्जव करीत होता, "मला श्वास घेता येत नाही, कृपया माझा जीव घेऊ नका," असे जॉर्ज म्हणत होता. मात्र, पोलिसाने त्याच्या विनवण्या ऐकल्या नाहीत, आणि जॉर्जचा मृत्यू झाला. या सर्व प्रकाराचा व्हिडिओ व्हायरल झाल्यानंतर अमेरिकेत "मला श्वास घेता येत नाही" या घोषवाक्याने आंदोलन सुरू आहे.
आत्तापर्यंत अमेरिकेत शेकडो कृष्णवर्णीय नागरिकांच्या क्रूर हत्या करण्यात आल्या आहेत. त्या सर्वांचे स्मरण या कार्यक्रमादरम्यान सर्फर्सने केले.
