वॉशिंग्टन : या वर्षीच्या सुरूवातीला जगभरातील हजारो संगणकांना फटका बसलेल्या मायक्रोसॉफ्ट एक्सचेंज ईमेल सर्व्हर हॅकिंगमागे चीनचाच हात असल्याचा थेट आरोप राष्ट्राध्यक्ष जो बायडेन प्रशासनाने सोमवारी केला.
चीनकडून असणाऱ्या इतरही अनेक सायबर धोक्यांचा खुलासाही बायडेन प्रशासन आणि सहकारी राष्ट्रांकडून करण्यात आला आहे. यात सरकारशी संलग्नित हॅकर्सकडून केल्या जाणाऱ्या रॅन्समवेअर हल्ल्याचाही उल्लेख आहे.
कंत्राटी हॅकर्सचा वापर करून चीनचे हल्ले
चीनच्या राष्ट्र सुरक्षा मंत्रालयाकडून गुन्हेगारी कंत्राटी हॅकर्सचा वापर केला जात असल्याचा दावा बायडेन प्रशासनातील एका उच्चपदस्थ अधिकाऱ्याने नाव न सांगण्याच्या अटीवर केला आहे. हे हॅकर्स स्वतःच्या फायद्यासाठी सायबर खंडणी मोहिमा राबवितात असे त्यांनी सांगितले. सोमवारीच अमेरिकेच्या न्याय विभागाने चार चीनी नागरिकांविरोधात आरोपांची घोषणा केली. हे सर्व जण चीनच्या राष्ट्र सुरक्षा मंत्रालयासाठी काम करत होते आणि कंपन्या, विद्यापीठे, सरकारी संस्थांच्या संगणकांवर हल्ला करणारी हॅकिंग मोहिम ते चालवत होते असा आरोप फिर्यादींनी केला आहे. बायडेन प्रशासन रशियन सिंडीकडेकडून केल्या जाणाऱ्या सायबर आणि रॅन्समवेअर हल्ल्यांवर नियंत्रण ठेवण्याचा प्रयत्न करत असताना चीनच्या सरकारी हॅकर्सकडून राबविल्या जाणाऱ्या सायबर हल्ल्याचा धोकाच या घोषणेमुळे अधोरेखित झाला आहे.
चीनचे हल्ले धक्कादायक
चीन सरकारशी संलग्न असलेल्या या हॅकर्सनी केलेले रॅन्समवेअर हल्ले हे आश्चर्यकारक आणि अमेरिकन सरकारसाठी चिंताजनक असल्याचेही अधिकारी म्हणाले.या हल्ल्यांमुळे चीनचा एक नवा आक्रमक चेहराच आपण बघत आहोत असेही ते म्हणाले. अमेरिकेसह युरोपियन युनियन आणि ब्रिटननेही या हल्ल्यांवरून चीनकडेच बोट दाखविले आहे. ब्लॉक 27 सदस्य राष्ट्रांच्या सरकारी संस्थांवर संशयास्पद सायबर हल्ले झाले असून हे हल्ले चीनी हॅकिंग ग्रुपकडून झाल्याचा संशय युरोपियन युनियनने व्यक्त केला होता. तर ब्रिटनच्या राष्ट्रीय सायबर सुरक्षा केंद्रानेही चीनी हॅकर्सनी सागरी सुरक्षा आणि नौदल सुरक्षेला लक्ष्य केल्याचे म्हटले होते.
रशियासोबत चीनही आक्रमक
अलिकडे समोर आलेल्या हाय प्रोफाईल रॅन्समवेअर हल्ल्यांमागे रशियन गुन्हेगारी संघटनांचा हात असल्याचे समोर आले आहे. मात्र चीनकडून अशा हल्ल्यांसाठी कंत्राटी हॅकर्सचा वापर हे जरा वेगळे आणि धक्कादायक असल्याचेही अधिकाऱ्यांनी म्हटले आहे. दरम्यान, अशा हल्ल्यांपासून स्वतःच्या संरक्षणासाठी वापरण्याच्या तंत्रज्ञानांविषयीची एक अॅडवायजरी एफबीआय, राष्ट्रीय सुरक्षा संस्था आणि सायबर सुरक्षा संस्थेने अलिकडेच जारी केली आहे.
