वॉशिंग्टन डी. सी - कोरोना विषाणूचे संकट सर्वच देशांपुढे अधिक गंभीर होत चालले आहे. दिवसेंदिवस रुग्णांच्या आणि मृतांच्या संख्येत वाढ होत आहे. अद्ययावत आकडेवारीनुसार आत्तापर्यंत जगभरात 3 लाख 3 हजार 372 कोरोनाबाधित रुग्ण दगावले आहेत. यामध्ये सर्वात जास्त मृत्यू अमेरिकेमध्ये झाले आहेत.
तब्बल 180 पेक्षा जास्त देशांमध्ये कोरोनाचे रुग्ण आढळून आले आहेत. जगभरात 45 लाख 25 हजार 420 कोरोनाबाधित आढळले असून 3 लाख 3 हजार 372 नागरिकांचा मृत्यू झाला आहे. यात दिलासादायक बाब म्हणजे, 17 लाख 3 हजार 808 लोक उपचारानंतर बरे झाले आहेत.
सर्वांत जास्त फटका अमेरिकेला बसला आहे. अमेरिकेमध्ये गेल्या 24 तासांमध्ये तब्बल 1 हजार 754 जणांचा मृत्यू झाला आहे. कोरोनामुळे आतापर्यंत 89 हजार लोकांचा मृत्यू झाला आहे. तर 14 लाखांहून अधिक जणांना संसर्ग झाला आहे.
