मुंबई : बॉलीवूड सुपरस्टार शाहरुख खान आणि त्याची पत्नी गौरी खान यांचे प्रोडक्शन हाऊस रेड चिलीज एंटरटेनमेंटने त्यांच्या आगामी 'जवान' चित्रपटामधील व्हिडिओ क्लिप चोरी झाल्यानंतर मुंबई पोलिसांकडे तक्रार दाखल केली आहे. रेड चिलीज एंटरटेनमेंटचे मुख्य अधिकारी प्रदीप निमाणी यांनी सांताक्रूझ पोलिस ठाण्यात १० ऑगस्ट रोजी तक्रार दाखल केल्यानंतर हा गुन्हा दाखल झाला. या सर्व प्रकाराने कॉपीराईडचे उल्लंघन झाले आहे. चित्रीकरणादरम्यान रेड चिलीज एंटरटेनमेंटने शूटिंगच्या ठिकाणी मोबाईल फोन आणि रेकॉर्डिंग डिव्हाइसेस आणण्यास मनाई केली होती. असे असताना देखील अज्ञात व्यक्तीने व्हिडिओ क्लिप चोरी करून या क्लिप सोशल मीडियावर प्रसारित केल्या आहेत.
'जवान' चित्रपटाची व्हिडिओ क्लिप चोरी : रेड चिलीज इंटरटेनमेंटच्या म्हणण्यानुसार हा सगळा प्रकार कंपनी तसेच चित्रपटाचे नुकसान करण्याच्या उद्देशाने केला गेला आहे. याबद्दल तक्रारदारीमध्ये देखील दाखल करण्यात आले आहे. रेड चिलीज इंटरटेनमेंटनुसार पाच ट्विटर हँडलवर 'जवान' चित्रपटाच्या क्लिप शेअर केल्या गेल्या आहेत. याप्रकारावर कायदेशीर नोटीसही पाठवण्यात आली आहे. सांताक्रुज पोलीस ठाण्यात भारतीय दंड संविधान कलम ३७९ आणि ४३ बी माहिती तंत्रज्ञान कायदा अंतर्गत अज्ञात इसमा विरोधात हा गुन्हा दाखल करण्यात आला असल्याची माहिती सांताक्रुज पोलीस ठाण्याचे वरिष्ठ पोलीस निरीक्षक राजेंद्र काणे यांनी दिली आहे. सध्या या प्रकरणाचा अधिक तपास सुरू आहे.
शाहरुख अ‍ॅक्शन करताना दिसणार : शाहरुख खान 'जवान' चित्रपटात अ‍ॅक्शन अवतारात दिसणार आहे. सुपरस्टारचे हे रूप याआधी कधीच दिसले नव्हते. या चित्रपटाचा ट्रेलर गेल्या महिन्यात प्रदर्शित झाला होता. यामध्ये शाहरुख वेगवेगळ्या रुपात दिसला होता. 'पठाण'नंतर आता शाहरुख खान 'जवान'सोबत बॉक्स ऑफिसवर धमाल निर्माण करण्याच्या तयारीत आहे.
चित्रपटाची स्टारकास्ट : शाहरुख खानची पत्नी गौरी खान आणि गौरव वर्मा यांनी रेड चिलीज एंटरटेनमेंट अंतर्गत चित्रपटाची निर्मिती केली आहे. या चित्रपटात शाहरुख खान व्यतिरिक्त नयनतारा, विजय सेतुपती, दीपिका पदुकोण, प्रियामणी आणि सान्या मल्होत्रा प्रमुख भूमिकेत आहे. 'जवान'चे दिग्दर्शन साऊथचे दिग्दर्शक अ‍ॅटली यांनी केले आहे. ७ सप्टेंबर रोजी हा चित्रपट चित्रपटगृहात प्रदर्शित होत आहे.
हेही वाचा :
- Sridevi's 60th Birthday : श्रीदेवीच्या वाढदिवसानिमित्त पती बोनी कपूर आणि मुलगी खुशी कपूर, जान्हवी कपूरने थ्रोबॅक फोटो केला शेअर...
- OMG 2 Collection Day 2 : 'OMG २' चित्रपट बॉक्स ऑफिसवर करतोय चांगली कामगिरी; जाणून घ्या दोन दिवसातील कमाई
- Ankita Lokhande Father Death : अंकिता लोखंडेच्या कुटुंबावर कोसळला दुःखाचा डोंगर...
