मुंबई : परवीन बाबी ही एक अभिनेत्री आणि मॉडेल होती. ती 1970 आणि 1980 च्या सुरुवातीच्या काळात हिंदी चित्रपटांमधील तिच्या ग्लॅमरस अभिनय शैलीसाठी ओळखली जात होती. ती एकेकाळची सर्वात जास्त मानधन घेणार्‍या अभिनेत्रींपैकी एक होती. तिच्या मॉडेलिंग आणि फॅशन सेन्सने तिला एक आयकॉन म्हणून स्थापित केले आहे.
टाइम मासिकावर झळकली : बाबीने तिच्या अभिनयाची सुरुवात चरित्र (1973) या चित्रपटातून केली आणि मजबूर (1974) या ड्रामा चित्रपटातील नीला या भूमिकेतून तिला ओळख मिळाली. अ‍ॅक्शन क्राईम-ड्रामा चित्रपट दीवार (1975) मध्ये अनिताच्या भूमिकेत तिला यश मिळाले त्यानंतर तिने अनेक यशस्वी चित्रपटांमध्ये भूमिका केल्या. विशेष म्हणजे टाइम मासिकाच्या मुखपृष्ठावर दिसणारी ती पहिली बॉलीवूड स्टार होती. 1980 च्या दशकाच्या मध्यापासून बाबीच्या कारकिर्दीला उतरती कळा लागली त्यामुळे तिने अखेरीस 1991 मध्ये चित्रपट क्षेत्रातून निवृत्ती घेतली.
इंग्रजी साहित्यात पदवी प्राप्त : परवीन बाबीचा जन्म 4 एप्रिल 1954 रोजी जुनागढ, सौराष्ट्र (आता गुजरातमध्ये) येथे झाला. जुनागढच्या कुलीन कुटुंबातील ती एकुलती एक मुलगी होती जे गुजरातचे पठाण म्हणून ओळखल्या जाणार्‍या पश्तूनांच्या खिलजी बाबी जमातीशी संबंधित होते. तिचे वडील वली मोहम्मद खान बाबी जुनागढच्या नवाबाचे प्रशासक होते. तर तिच्या आईचे नाव जमाल बख्ते बाबी होते. 1959 मध्ये ती पाच वर्षांची असताना तिच्या वडिलांचा मृत्यू झाला. तिने तिचे सुरुवातीचे शालेय शिक्षण माउंट कार्मेल हायस्कूल, अहमदाबाद येथून पूर्ण केले आणि नंतर सेंट झेवियर्स कॉलेज, अहमदाबाद येथे शिक्षण घेतले. तिथे तिने इंग्रजी साहित्यात कला शाखेची पदवी प्राप्त केली.
शेवटपर्यंत अविवाहित राहिली : बाबी अभिनेता डॅनी डेन्झोंगपासोबत चार वर्षे रिलेशनशिपमध्ये होती. नंतर तिने कबीर बेदी आणि नंतर महेश भट्ट यांना डेट केले, मात्र ती अविवाहितच राहिली. 1990 च्या दशकाच्या उत्तरार्धात तिने ख्रिश्चन धर्म स्वीकारला असे म्हटले जाते. 30 जुलै 1983 रोजी परवीन बाबीने भारत सोडला आणि यू.जी. कृष्णमूर्ती आणि तिचे मित्र व्हॅलेंटाईन यांच्यासोबत आध्यात्मिक शोधासाठी विविध देशांमध्ये प्रवास केला. तिने कॅलिफोर्निया आणि ह्यूस्टनमध्ये काही काळ घालवला. नोव्हेंबर 1989 मध्ये ती मुंबईत परतली. 90 च्या दशकात तिला पॅरानॉइड स्किझोफ्रेनियाचे निदान झाले तसेच तिला गुडघ्याचा ऑस्टिओआर्थरायटिसही होता. 20 जानेवारी 2005 रोजी तिचे अवयव निकामी झाल्याने निधन झाले.
हेही वाचा : Alia Bhatt Hollywood Debut : आलियाच्या हॉलिवूड पदार्पणाचा हार्ट ऑफ स्टोन ऑगस्टमध्ये होणार प्रदर्शित
