रामपूर - warrant against Jaya Prada : चित्रपट अभिनेत्री आणि माजी खासदार जया प्रदा यांच्या अडचणीत पुन्हा एकदा वाढ होताना दिसतेय. काही दिवसापूर्वी जया प्रदा यांच्या विरोधात वॉरंट जारी करण्यात आलं होतं. असं असूनही बुधवारी ती्या न्यायालयात पोहोचल्या नाहीत. न्यायालयानं आता त्यांच्याविरुद्ध अजामीनपात्र वॉरंट जारी केलंय. लोकसभा निवडणुकीदरम्यान आचारसंहिता भंग केल्याप्रकरणी माजी खासदार जया प्रदा यांच्याविरोधात हे वॉरंट जारी करण्यात आलंय. या प्रकरणाची सुनावणी आता १७ नोव्हेंबरला होणार आहे.
जयाप्रदा यांनी २०१९ ची लोकसभा निवडणूक भाजपाच्या तिकीटावर रामपूरमधून लढवली होती. या निवडणुकीत त्यांचा पराभव झाला. त्यांच्याविरुद्ध स्वार पोलिस ठाण्यात गुन्हा दाखल करण्यात आला होता. उड्डाण पथकाचे प्रभारी डॉ. नीरजकुमार पराशरी यांच्या तक्रारीवरून आचारसंहिता भंगाचा गुन्हा दाखल करण्यात आला. निवडणूक आचारसंहिता लागू असतानाही 19 एप्रिल रोजी माजी खासदार जयाप्रदा यांनी रामपूरच्या नूरपूर गावात रस्त्याचं उद्घाटन केल्याचा आरोप करण्यात आला आहे. त्याचा व्हिडिओही प्रसारित करण्यात आला.
कोर्टानं बजावलं होतं समन्स - या प्रकरणी पोलिसांनी तपास पूर्ण करून न्यायालयात दोषारोपपत्र दाखल केलं होतं. रामपूरच्या खासदार-आमदार विशेष न्यायालयात (मॅजिस्ट्रेट ट्रायल) या प्रकरणाची सुनावणी सुरू आहे. या प्रकरणात साक्ष देण्याची प्रक्रिया पूर्ण झाल्यानंतर, माजी खासदार जया प्रदा यांना कलम 313 अंतर्गत त्यांचं म्हणणे नोंदवण्यासाठी कोर्टानं बोलावलं होतं. न्यायालयाच्या आदेशानंतरही जयाप्रदा अनेक तारखांच्या सुनावणीवेळी हजर राहिल्या नाहीत. बुधवारी त्या पुन्हा एकदा हजर होणार होत्या.
आदेश देऊनही जयाप्रदा कोर्टात गैरहजर : जयाप्रदा बुधवारी कोर्टात हजर होणार होत्या, मात्र त्या कोर्टात पोहोचल्या नाहीत. या प्रकरणी न्यायालयानं पुन्हा अजामीनपात्र वॉरंट जारी केल्याचं भाजप आमदारांचं वकील संदीप सक्सेना यांनी सांगितलं. या प्रकरणी आता 17 नोव्हेंबर रोजी न्यायालयात सुनावणी होणार आहे.
