ठाणे - लोकमान्यनगर येथील रस्त्यावरील चेंबर तुटून महिला जखमी झाली. या प्रकरणी, महिलेच्या तक्रारीवरून ठेकेदारावर गुन्हा दाखल करण्यात आला आहे.
शहरातील डवलेनगर परिसरात राहणाऱ्या प्रीती सिंग (वय - 26) या भाजी आणण्यासाठी घराबाहेर पडल्या होत्या. यावेळी लोकमान्यनगर बस डेपोकडून यशोधननगरकडे जाणाऱ्या रस्त्यावरून चालत असताना या रस्त्यावर जवळपास 5 फूट खड्डा पडला असल्याचे प्रीती यांच्या लक्षात आले नाही. यामुळे त्या खड्ड्यात पडल्या. प्रीती यांनी खड्ड्यातून आवाज दिला; आणि रस्त्यावरून चालणाऱ्या नागरिकांनी त्यांना खड्ड्यातून बाहेर काढले. प्रीती यांना जबर मुक्का मार लागला असून त्यांच्यावर उपचार सुरू आहेत.
दरम्यान, या घटनेनंतर महापालिकेच्यावतीने अशा प्रकारे रस्त्याचे नित्कृष्ठ दर्जाचे काम करणाऱ्या ठेकेदारावर गुन्हा दाखल करण्यात यावा, अशी मागणी स्थानिक नागरिकांनी लावून धरली होती. त्यानंतर या प्रकरणी वर्तकनगर पोलिसांनी संबंधित रस्त्याचे काम करणाऱ्या अज्ञात ठेकेदारावर बुधवारी रात्री उशिरा गुन्हा दाखल केला. या घटनेचा पुढील तपास सुरू असून लवकरच ठेकेदाराला चौकशीसाठी बोलवण्यात येईल, अशी माहिती पोलिसांनी दिली.
