ठाणे - गणेशत्सोवा दरम्यान खाद्यपदार्थामध्ये चर्चा असते ती मोदकाची आणि मोदक म्हटलं की आपल्यासमोर उकडीच्या मोदकांनी भरलेले ताट येते. मात्र ठाण्यातील प्रशांत कॉर्नर या मिठाईच्या दुकानाने आयोजित केलेल्याम मोदक महोत्सोवामध्ये खाद्यप्रेमींना मोदकाचे विविध प्रकार पाहण्याची संधी मिळाली आहे. या महोत्सवात सोन्याचा वर्ख लावलेल्या मोदकासह अनेक प्रकारचे मोदक गणेशभक्तांच्या आकर्षणाचे केंद्रबिंदू ठरत आहेत. अगदी 9 हजार रुपयांपासून 500 रुपयांपर्यंतचे मोदक या ठिकाणी मिळत असून त्याला ग्राहकांचा चांगला प्रतिसाद मिळत आहे.
सोन्याचा वर्ख लावलेल्या मोदकाची किंमत 9 हजार रुपये -
या महोत्सवात केवळ 575 रुपयांपासून सुरू होऊन तब्बल नऊ हजारांपर्यंतच्या मोदक गणेश भक्तांचे लक्ष वेधून घेत आहेत. अर्धा किलो एक किलो ते तब्बल चार किलोपर्यंतचे मोदक या महोत्सवात विक्रीसाठी ठेवण्यात आले असून अंजीर, रोझ, ड्रायफ्रूट, मावा अशा अनेक प्रकारचे मोदक इथे पाहायला मिळत आहेत. सात हजार ते नऊ हजार रुपयांच्या मोदकांवर शुद्ध सोन्याचा वर्ख लावण्यात आल्याची माहिती दुकानाचे व्यवस्थापक प्रमोद बापट यांनी दिली.
'प्रशांत कॉर्नर मध्ये आपण नेहमीच ग्राहकांना त्यांच्या आवडी चहा मिठाई उपलब्ध करून देत असतो, नवनवीन आणि आकर्षक मिठाई ग्राहकांच्या पसंतीस उतरत असतात', असे त्यांनी सांगितले. एवढ्या मोठ्या प्रमाणात सोन्याचा वर्ख लावून मोदकांची विक्री करणारे बहुधा आपण एकमेव मिठाईचे दुकानदार असल्याची माहिती बापट यांनी मोठ्या अभिमानाने दिली. गतवर्षी दिवाळीच्या काळात देखील तब्बल 15 हजार रुपये किलो दराची मिठाई आपण ग्राहकांना उपलब्ध करून दिली होती, त्याला ग्राहकांनी उदंड प्रतिसाद दिला, असेही त्यांनी सांगितले.
ठाणे शहरात अनेक ठिकाणी अत्यंत चांगल्या प्रतीची मिठाई मिळते. परंतु प्रशांत कॉर्नर या दुकानात जी व्हरायटी मिळते, किंवा जी विविधता मिठाईमध्ये दिसून येते ती इतरत्र दिसत नाहीत. त्यामुळे आपण सणासुदीचे किंवा इतरही वेळी याच दुकानातून मिठाई खरेदी करतो, असे मनोगत या ठिकाणी आलेल्या ग्राहकांनी व्यक्त केले.
हेही वाचा - वसईत बाप्पासोबत लाखो रुपयांच्या मुकूटाचंही पाण्यात विसर्जन; वाचा पुढे काय घडलं
