ठाणे - सोशल मीडियावर पोस्ट टाकल्याप्रकरणी ठाण्यातील तरुणाला राष्ट्रवादी काँग्रेसचे आमदार जितेंद्र आव्हाड यांच्यासमोर बेदम मारहाण झाल्याच्या कथित प्रकरणावरून आव्हाड अडचणीत सापडले आहेत. याप्रकरणी घोडबंदर येथे राहणाऱ्या तरुणाची भेट घेण्यास जाणाऱ्या भाजप नेत्यांना ठाण्यातील आनंदनगर टोल नाक्यावर अडवण्यात आले.
जिल्हाबंदी असल्याचे कारण देत ठाणे पोलिसांनी अडवणूक केली. यावेळी विधानपरिषदेचे विरोधी पक्षनेते प्रवीण दरेकर, भाजपचे माजी खासदार किरीट सोम्मैया, आमदार निरंजन डावखरे यांची अडवणूक करण्यात आली. एकीकडे राज्यात कोरोनाचे संकट असताना दुसरीकडे ठाण्यातील तरुणाला झालेल्या मारहाणीवरून चांगलेच वातावरण तापले आहे.
नरेंद्र मोदी यांनी दिवे लावण्याचे आवाहन केले होते. दरम्यान, या कार्यक्रमाला आमदार आव्हाड यांनी विरोध केला असल्याने ठाण्यातील तरुणाने सोशल मीडियावर विरोधात पोस्ट टाकली होती.
आव्हाड यांच्या बंगल्यावर या तरुणाला घेऊन जाऊन प्रचंड मारहाण करण्यात आली होती, असे म्हणणे या तरुणाचे होते. याच पार्श्वभूमीवर भाजपचे नेते तरुणाची भेट घेण्यासाठी बुधवारी जात असताना ठाण्याच्या आनंदनगर येथे पोलिसांनी अडवले. दरम्यान, पोलीस प्रशासनाने त्यांना येऊ दिले नसल्याने पुन्हा मुंबईमध्ये पाठवले.
