ठाणे - डिजिटल युगात ठाण्यातील नागरिकांसोबत विविध योजनाच्या माध्यमातून थेट संवाद साधणाऱ्या ठाणे महापलिकेच्या स्मार्टसिटी अंतर्गत डिजीठाणे या डिजीटल प्रणालीने १ लाख नोंदणीचा टप्पा नुकताच पार केला आहे. यापुढेही पालिकेच्या डिजीटल उपक्रमाला ठाणेकरांनी प्रतिसाद द्यावा, असे आवाहन स्मार्टसिटी लिमिटेडचे मुख्य कार्यकारी अधिकारी समीर उन्हाळे यांनी केले आहे.
गेल्या वर्षभराच्या कालावधीत डिजीठाणेने ठाणे महानगरपालिकेला आणि नागरिकांना एकमेकांशी सुसंवाद साधण्याचा नवा मार्ग उपलब्ध करून दिला आहे. त्याची उपयुक्तता नागरिकांच्या लक्षात आल्याने जास्तीत जास्त नागरिकांनी डिजीठाणे आपल्या मोबाईल व इतर उपकरणांत डाऊनलोड केले आहे. त्यामुळे डिजीठाणे प्रणाली आता ठाण्यातील १ लाख नागरिकांच्या घरापर्यंत पोहोचली आहे. या डिजीटल प्रणालीद्वारे ४ लाखांहून अधिकवेळा ठाणेकरांनी ठाणे महापालिकेशी दुहेरी संवाद साधला आहे.
डिजीटल प्रणालीच्या माध्यमातून नागरिकांना ठाणे महापालिकेच्या नव्या वेगवेगळ्या योजनांबरोबरच ठाण्यातील सांस्कृतिक, सामाजिक घडामोडीचीही माहिती तात्काळ मिळते. नामांकित दुकाने, हॉटेल्स यांची डिस्काऊंट कुपन्सही या माध्यमातून दिली जातात. आरोग्याबद्दल सजग असलेल्या ठाणेकरांना आरोग्य उत्तम राखण्यातही डिजीठाणेचे सहाय्य होत असून शैक्षणिक माहितीही याद्वारे उपलब्ध होत आहे.
डिजीठाणेने गेले वर्षभर राबविलेले अनेक नाविन्यपूर्ण उपक्रम ठाणेकर नागरिकांमध्ये लोकप्रिय ठरले आहेत. ठाण्यात कोणते उपक्रम राबविणे गरजेचे आहे हे डिजीठाणेच्यावतीने सर्वेक्षणाच्या माध्यमातून ठाणेकर नागरिक सूचवत असतात. यामध्ये ठाण्यातील शाळकरी मुले, युवक, नोकरदार ते सेवानिवृत्त कर्मचारी या सर्वांनाच हे उपयुक्त ठरतील असे उपक्रम ही डिजीटल प्रणाली राबवत असते.
पक्षाघात व त्याची काळजी कशी घ्यावी याची माहिती देणारी कार्यशाळा, योगप्रशिक्षण शिबीर, शाळकरी मुलांसाठी प्रश्नमंजुषा, रक्तदानासाठीचे उपक्रम, राम मारुती रोडवरील शॉपिंग फेस्टिवल, ठाणे युथ आयकॉन स्पर्धा, डिजीमित्र वेबसेमिनार मालिका, छायाचित्र स्पर्धा, क्रिकेट अंदाज स्पर्धा, असे अनेक उपक्रम डिजीठाणेद्वारे आयोजित करण्यात आले. या सर्व उपक्रमाला ठाणेकरांनी उत्तम प्रतिसाद दिला आहे. डिजीठाणेच्या पुढील सर्व उपक्रमाला ठाणेकरांनी प्रतिसाद द्यावा, असे आवाहन ठाणे महापलिकेच्यावतीने करण्यात आले आहे.