ठाणे - देव तारी त्याला कोण मारी! याचा प्रत्यय ठाण्यात आला आहे. गुरुवारी सायंकाळच्या सुमारास मीना शामिल नाडमीकेरी नावाच्या 40 वर्षीय महिलेला भरधाव कारने धडक मारून सुमारे 50 मीटर अंतरापर्यत फरफटत नेले. ही घटना सिद्धांचल, पवारनगर येथे घडली. अपघातानंतर महिलेची विचारपूस न करता मुजोर कारचालक कारसह फरार झाला. मात्र, कारची जोरदार धडक बसूनही सुदैवाने महिला बचावली असून त्यांच्यावर खासगी रुग्णालयात उपचार सुरू आहेत. हा सर्व प्रकार सीसीटीव्ही कॅमेऱ्यात कैद झाला आहे. चितळसर पोलीस कारचालकाचा शोध घेत आहेत.
ठाण्यातील पोखरण रोड नं.2 वडारवाडी येथे राहणाऱ्या मीना नाडमीकेरी ही घरकाम करणारी महिला काम आटोपून पायी घरी जात होती. सायंकाळी सव्वासहाच्या सुमारास सिद्धाचल फेज - 6 रस्त्यावर अचानक पाठीमागून भरधाव वेगाने आलेल्या कारने तिला जोरदार धडक दिली. धडक लागून कारच्या बोनेटवर पडलेल्या मिना यांना कारचालकाने 50 मीटरपर्यत फरफटत नेले.
दरम्यान, पळून जाताना चालकाने कार उजव्या दिशेला वळवल्याने मीना कारच्या बोनेटवरुन खाली पडल्या. तर, कारचालक घटनास्थळावरून कारसह पसार झाला. त्याठिकाणी उपस्थित असलेल्या नागरिकांनी तात्काळ जखमी मीना यांना खासगी रुग्णालयात दाखल केले. कारची धडक बसुनही मीना यांचा जीव बचावल्याने देव तारी त्याला कोण मारी याचाच प्रत्यय आला.
हा सर्व प्रकार सीसीटीव्ही कॅमेऱ्यात कैद झाला आहे. चितळसर पोलिसांनी कारचा माग काढला आहे, अशी माहिती सहायक पोलीस निरीक्षक तानाजी रोडे यांनी दिली. दरम्यान, गुरुवारी सांयंकाळी घोडबंदर रोडवरील तत्वज्ञान विद्यापीठानजीक आणखी एक अपघात घडला. भरधाव कारची धडक बसून 17 वर्षीय दुचाकीस्वाराचा मृत्यू झाला. याप्रकरणी,चितळसर पोलिसांनी कारचालकाला अटक केली आहे.
