ठाणे - आगामी नववर्षस्वागत ( New Year Celebration 2022 ) आणि नाताळ सुट्टीसाठी ( Christmas holidays ) हौशी पर्यटकांची पाऊले पर्यटनस्थळांकडे ( Thane Tourism ) वळू लागली आहे. मागील गेल्या २ वर्षांपासून कोरोनाच्या भितीमुळे हौशी पर्यटकांना मित्र, कुटूंबीय आणि नातेवाईकांसोबत पर्यटनास मूकावे लागले होते. आता मात्र काही दिवसांवर येऊन ठेपलेल्या नाताळ आणि नववर्ष स्वागताची भुरळ पर्यटनप्रेमींना पडू लागल्याने ठाणे, पालघर जिल्ह्यातील पर्यटनस्थळांच्या निवासाचे ९० टक्के आरक्षण करण्यात आल्याची माहिती पर्यटन विकास महामंडळाच्या अधिकाऱ्यांनी दिली आहे.
ओमायक्रॉनचा फारसा परिणाम नाही ( Omicron Patients In Maharashtra ) -
ठाणे जिल्ह्यात २१ पर्यटनस्थळे आहेत. त्यापैकी मुरबाड तालुक्यातील माळशेज घाट, शहापूर तालुक्यातील निसर्गरम्य रिसॉर्ट, पालघर जिल्ह्यातील वसई, डहाणू, जव्हार तसेच नाशिक जिल्ह्यातील ग्रेप पार्क, भंडारदरा, लोणावळा (कार्ला), माथेरान, कोकणातील तारकर्ली, कुणकेश्वर, हरिहरेश्वर, गणपतीपुळे अशा प्रमुख ठिकाणी पर्यटकांच्या निवासाचे ९० टक्के आरक्षण झाले आहे. शिवाय ठाणे जिल्ह्यातील खाजगी निसर्गरम्य परिसरात असलेल्या बहुतांश रिसॉर्टची बुकींग आदीच झाल्याने येणाऱ्या नववर्षाच्या स्वागतासाठी सर्वजण उत्सुक असल्याचे दिसून आले आहे. विशेष म्हणजे कोरोना व्हायरसचा नवा विषाणू म्हणजे ओमायक्रोनची भिती आहे. मात्र शासनाने केलेल्या उपाययोजना व नव्या विषाणू ओमायक्रोनचा फारसा परिणाम दिसत नसल्याने पर्यटनाकडील ओढा वाढू लागला आहे.
पर्यटनस्थळी खबदारी घेऊनच पर्यटकांना प्रवेश -
महाराष्ट्र पर्यटन विकास महामंडळाची पर्यटक निवास, रिसॉर्ट खुली करण्यात आली आहेत. पर्यटकांना चांगल्या दर्जाची सेवा आणि आरोग्यपूर्ण सुविधा उपलब्ध करुन देण्याचा प्रयत्न महामंडळाकडून केला जात आहे. त्यामुळे तब्बल २ वर्षांनंतर पर्यटकांना पर्यटन, निसर्ग व वेगवेगळ्या ठिकाणच्या खाद्यपदार्थांचा आस्वाद घेता येणार आहे. त्यासाठी पर्यटक निवास, उपहारगृहे व अनुषंगिक बाबींची काटेकोरपणे स्वच्छता, निर्जंतुकीकरण करण्यात येत आहे. शरीराचे तापमान मोजणारी यंत्रणा, सॅनिटाइज करणारे स्प्रे, आँक्सीमीटर, मास्क, हातमोजे, तातडीच्या वैद्यकीय सुविधा उपलब्ध करुन देण्याचे नियोजन करण्यात आले आहे.
पर्यटकस्थळी विविध कार्यक्रमांची मेजवानी -
नववर्षस्वागत आणि नाताळसाठी पर्यटक निवासांमध्ये तयारी करण्यात आली आहे. तेथे सांताक्लॉज, चॉकलेटीची सोय करण्यात आली आहे. लॉकडाऊनमुळे कंटाळलेल्या पर्यटकांना पर्यटनविषयक सुविधा, खाद्यपदार्थांची माहिती, आसपासच्या निसर्गाची माहिती, स्थानिक खेळ, परंपरा, सांस्कृतिक कार्यक्रम, वन्यजीव, वृक्षवल्ली, खबरदारी, सुरक्षिततेच्या उपाययोजना यांची माहिती देऊन जागृती करण्यात येत असल्याचे पर्यटन महामंडळाचे प्रादेशिक व्यवस्थापक, दीपक हरणे यांनी सांगितले.
