सोलापूर: कॉलेजच्या एका अल्पवयीन मुलीचा कर्नाटकातील चडचण येथे होणारा बालविवाह मंगळवेढा पोलिसांनी रोखला. मुलीच्या आई- वडिलांचे व मुलीचे समुपदेशन करून त्या अल्पवयीन मुलीला सोलापूर येथील बालसुधारगृहात दाखल करण्यात आले. सदर अल्पवयीन मुलगी ही महाविद्यालयीन शिक्षण घेत आहे. तीने शिक्षणासाठी विवाह रोकावा अशी माहिती पोलिसांना दिली. त्यानंतर मंगळवेढा पोलिसांनी मध्यस्थी करून समुपदेशन केले. व हा बालविवाह रोखला.
नियंत्रण कक्षाच्या १०० नंबरवर संपर्क : मंगळवेढा तालुक्यातील डोणज येथील एका १६ वर्षे १६ दिवस पूर्ण झालेल्या मुलीचा कर्नाटकातील निंबर्गी येथील एका २४ वर्षीय मुलाशी २१ जुलै रोजी कर्नाटकात बालविवाह करण्याची तयारी सुरु होती. मात्र, त्या अल्पवयीन कॉलेज तरूणीस हा बालविवाह मान्य नसल्याने तिने थेट सोलापूर येथील पोलीस नियंत्रण कक्षाच्या १०० नंबरवर संपर्क साधून या अल्पवयीन विवाहाबाबतची माहिती दिली.
कायद्याबाबत जनजागृती : मंगळवेढ्याच्या डीवायएसपी राजश्री पाटील यांच्या मार्गदर्शनाखाली पोलीस निरीक्षक रणजित माने यांनी तत्काळ बोराळे बीटचे पोलीस हवालदार महेश कोळी यांना पाचारण करून सदर मुलीस व मुलीचे आई-वडील व मामा यांना मंगळवेढा पोलीस ठाण्यात हजर करून पोलीस निरीक्षक माने यांनी मुलीच्या आई-वडिलांना कायद्याबाबत जनजागृती करून त्यांचे मनपरिवर्तन केले.
एका आठवड्यात दोन बालविवाह रोखले : १८ वर्षे पूर्ण झाल्याशिवाय लग्न करणार नाही असा लेखी जवाब मंगळवेढा पोलिसांनी लिहून घेतला.सदर अल्पवयीन मुलीस सोलापूर येथील बालसुधारगृहात पोलीस शिपाई रंजना आटपाडकर यांनी त्या अल्पवयीन मुलीस दाखल केले. दरम्यान, मागील आठवड्यात मंगळवेढा शहरानजीक असलेल्या एका मंगल कार्यालयात ७ विवाहापैकी एक बालविवाह होत असल्याची माहिती पोलिसांना मिळताच त्यांनी तेथे जाऊन तो बालविवाह रोखला होता.
