खासगी रुग्णालयात लसीकरणाला सुरुवात.. मंगळवारपासून प्रतिदिन दोन हजार लोकांचे होणार लसीकरण

खासगी रुग्णालयात लसीकरण सुरु झाल्याने लसीकरण मोहिमेला आता नव्याने उभारी मिळाली आहे. पुण्यातील दिनानाथ मंगेशकर रुग्णालयाच्यावतीने कोथरूड येथील बाल शिक्षण संस्था येथे लसीकरणाला सुरूवात झाली आहे. आज एक हजार लोकांना 900 रुपयात लसीकरण करण्यात आले आहे. उद्यापासून हे प्रमाण वाढवून दोन हजार करण्यात येणार आहे.

पुणे - पुणे महापालिकेला राज्य शासनाकडून सातत्याने लसपुरावठा होत नसल्याने वारंवार बंद पडणाऱ्या लसीकरण मोहिमेला आता खासगी रुग्णालयात लसीकरण सुरु झाल्याने नव्याने उभारी मिळाली आहे. पुण्यातील दिनानाथ मंगेशकर रुग्णालयाच्यावतीने कोथरूड येथील बाल शिक्षण संस्था येथे लसीकरणाला सुरूवात झाली आहे. आज 1000 लोकांना 900 रुपयात लसीकरण करण्यात आले आहे. उद्यापासून हे प्रमाण वाढवून दोन हजार करण्यात येणार आहे.

14 ते 44 वयोगटातील नागरिकांचेही लसीकरण सुरू -

खासगी रुग्णालयात लसीकरणाला सुरवात झाल्यानंतर विशेष बाब म्हणजे 14 मे पासून 18 ते 44 वयोगटातील वर्गाचे बंद पडलेले लसीकरण खासगी रुग्णालयात सुरु झाल्याने मोठया प्रमाणात या वयोगटातील नागरिक नोंदणी करून लसीकरण करत आहेत.

900 रुपयात मिळत आहे लस -

खासगी रुग्णालयांना सिरम इंस्टिट्यूटकडून थेट लस 630 रुपयाला मिळत असल्याने शहरातील काही खासगी रुग्णालयात 800 तर काही ठिकाणी 900 रुपयात दिली जात आहे. दिनानाथ रुग्णालयाने सिरम इंस्टिट्यूटकडून 36 हजार लस खरेदी केल्या असून आज 1000 नागरिकांना लस देण्यात आली आहे. उद्यापासून (मंगळवार) दोन हजार लोकांना लस देण्यात येणार आहे. पूर्वी शासनाने जेव्हा लस घेतली होती तेव्हा त्यात 100 एडिशनल लावून खाजगी रुग्णालयात ती 250 रुपयाला मिळत होती पण आत्ता तीच लस 630 रुपयाला मिळत आहे. त्यामुळे ही थोडीशी रक्कम वाढलेली आहे. अशी माहिती दिनानाथ रुग्णलयाचे डॉक्टर योगेश पंचमाले यांनी दिली.

दिनानाथ दररोज 100 ते 200 डोस गरजूंना मोफत देणार -

दिनानाथ रुग्णालयाला जे सीरमकडून 36 हजार डोस मिळाले आहेत, त्यात अजून काही डोसची मागणी देखील सिरमकडे करण्यात आली आहे. दिनानाथ रुग्णालयाच्यावतीने दरोरोज 100 ते 200 डोस हे गरजूंना मोफत देण्यात येणार आहे. त्याच पद्धतीने जास्तीत जास्त लसीकरण कशा पद्धतीने करण्यात येईल यावर अधिक लक्ष देण्यात येणार आहे. 45 पुढील वयोगटासाठी आणि 18 ते 44 वयोगटातील नागरिकांसाठी विशेष सोय देखील करण्यात आली आहे.

युवा वर्गाची मोठ्या प्रमाणात खासगी रुग्णालयात धाव -

शहरातील मोठ्या खासगी रुग्णालयांना शनिवारपासून सिरम इन्स्टिट्यूटकडून थेट लस पुरवठा सुरू झाला असल्याने गेली दोन दिवस काही ठिकाणी प्रत्यक्ष लसीकरण सुरू झाले आहे. यामुळे महापालिकेकडे येणाऱ्या तुटपुंज्या लस साठ्याला आता खासगी रुग्णालयांमधील लसीकरणाचा बूस्टरच मिळाला आहे. त्यातच नागरिकांना प्रथम लस हवी आहे, मग ती पैसे देऊन का मिळावी अशी आता मानसिकता झाली आहे. त्यामुळे अनेकांनी पैसे भरून खासगी रुग्णालयांकडे धाव घेतली आहे. त्यातच कुठल्याही वयोगटाची अट नाही, कोविन अॅपवर नोंदणी करून लागलीच लस मिळत असल्याने युवा वर्ग सध्या मोठ्या प्रमाणात खासगी रुग्णालयांकडे धाव घेत आहे.