पुणे - भारतात अनेक थोर संत, क्रांतिकारक, विद्वान, तसेच अनेक साहित्यिक होऊन गेले. भारताने जगाला नेहमीच शांतता, प्रेम आणि सद्भभावनेचा संदेश दिला. आज या 130 करोड लोकसंख्या असलेल्या भारतात सर्व धर्मीय लोक हे गुण्यागोविंदाने राहतात आणि प्रेमाचा संदेश देतात. पण, अश्या प्रेमाच्या भारतात आम्हाला आमचे अधिकार मिळावे आणि आम्हालाही आमच्या प्रेमाबरोबर लग्न करण्याची परवानगी द्यावी, अशी मागणी करत आज ( 5 मे ) पुण्यात हजारो एलजीबीटी समुहाच्या माध्यमातून प्राईड रॅलीचे आयोजन करण्यात आले ( LGBT Rally In Pune ) होते.
एलजीबीटी कम्युनिटीकडून पुण्यात आज प्राईड रॅली काढण्यात आली. पुण्यातील छत्रपती संभाजी महाराज बागेपासून या रॅलीला सुरुवात झाली. डेक्कनला वळसा घालून पुन्हा ही रॅली छत्रपती संभाजी महाराज बागेपशी समाप्त झाली. या रॅलीत मोठ्या संख्येने लोक सहभागी झाले होते. यावेळी प्रेम म्हणजे प्रेम असतं तुमचं आमचं सेम असतं, अशा घोषणा देण्यात आल्या. तसेच, सप्तरंगी मोठा ध्वज देखील यावेळी हातात धरण्यात आला होता.
समाजाचा एलजीबीटी समुहाकडे बघण्याचा दृष्टिकोन बदलावा, त्यांना समानतेची वागणूक मिळावी. एलजीबीटी समुहाचा समाजाने तिरस्कार करु नये या हेतूने ही रॅली काढण्यात आली होती. या रॅलीत एलजीबीटी समुहाच्या लोकांबरोबरच अनेक सामाजिक कार्यकर्ते देखील सहभागी झाले होते. रॅलीमध्ये विविध घोषणा लिहीलेले फलक हातात धरण्यात आले होते.
आम्हाला लग्नाची परवानगी द्यावी. कलम 377 रद्द झालं असलं तरी म्हणावे तितके समान हक्क एलजीबीटी समुहाला मिळालेले नाहीत. लोकांमध्ये अजूनही आमच्या बद्दल चुकीचे समज आहेत. आम्ही देखील या समाजाचा एक भाग आहे. आम्हाला देखील समान हक्क आहेत. आम्हाला आमच्या हक्कासाठी जगू द्या. आज कायदा झाला पण आम्ही एकमेकांशी लग्न करू शकत नाही. इच्छा असताना ही आम्ही लग्न करू शकत नाही. त्यामुळे आम्हाला एकमेकांशी लग्न करण्याची परवानगी देण्यात यावी, अशी मागणी यावेळी मोर्चात उपस्थित असलेल्यांकडून करण्यात आली.
समजाने आम्हाला स्वीकारावं - या मोर्चात अनेक जोडीदार आपल्या हक्कासाठी सहभागी झाले होते. यातील एका जोडीदाराशी संवाद साधला असताना त्यांनी म्हणाले की, आम्ही गेल्या तीन वर्षापासुन कपल म्हणून एकत्र राहत आहो. प्रेम हे प्रेम असते, ते कोणाशीही होऊ शकते. आम्हा दोघींना आमच्याशीच प्रेम झालं आहे. पण, समाजात राहत असताना लोकांकडून आम्हाला स्वीकारलं जात नाही. आम्हाला दोघांना लग्न करायचं आहे. मात्र, घरचे आणि समाज आम्हाला स्वीकारत नाही. त्यामुळे आम्हाला आमच्या आयुष्याप्रमाणे जगू द्या, अशी मागणी जोडीदाराने केली आहे.
हेही वाचा - Neelam Gorhe : काश्मिरी महिला पंडितांच्या हाती शस्त्र द्या; नीलम गोऱ्हेंची केंद्राकडे मागणी
