पुणे - गणपतीची मूर्ती साकारणारे आजवर अनेक हात तुम्ही पाहिले असतील. पण आज आम्ही तुम्हाला असे हात दाखवणार आहोत जे उद्याचे उज्वल भविष्य आहेत. तेच हात आज देशाला एकजुटीचा संदेश देत आहेत.
गणेशाची मूर्ती साकारणारे हे आहेत मुस्लिम समाजातील विद्यार्थ्यांचे. गणेशोत्सवात मित्रांच्या घरचे बाप्पा पाहणारे, बाप्पांचे चित्र रेखाटणारे हे हात शाडू मातीच्या गोळ्यापासून बाप्पांना साकारण्यासाठी एकवटलेत. पिंपरी चिंचवड महापालिकेच्या शाळांमध्ये शिक्षण विभागाकडून शाडूची मूर्ती साकारण्याचं प्रशिक्षण दिलं जातंय. त्याचाच एक भाग म्हणून आकुर्डीच्या फकीरभाई पानसरे उर्दू शाळेत हा उपक्रम पार पडला.
मुस्लिम विध्यार्थ्यानी आपल्या हाताने घडवलेली ही बाप्पाची मूर्ती ते त्यांच्या हिंदू मैत्रिणींना भेट म्हणून देणार आहेत. तर गणेशोत्सवादरम्यान त्याच मैत्रिणीच्या घरी आरतीलाही ते हजर राहणार आहेत.
इको फ्रेंडली मूर्तीतून पर्यावरणाचा आणि हिंदू-मुस्लिम एकतेचा संदेश देण्याच्या हा हेतू होता. हे सामाजिक धडे केवळ पुस्तकी ज्ञानातून देण्याऐवजी प्रात्यक्षिकातुन दिल्याने शिक्षकांचाही भार कमी झाला आहे.
मूर्ती बनवताना खूप छान वाटलं, गणपती बाप्पाची मूर्ती खूप आवडते, असे येथील विद्यार्थी आवर्जून सांगतात. पिंपरी चिंचवड शहरातील या उपक्रमाचा आदर्श राज्यातील प्रत्येक शिक्षण विभागाने नक्कीच घ्यायला हरकत नाही.
हेही वाचा- पुण्यात नारळाच्या झाडाचे डोहाळे जेवण; पहिला तुरा आल्याने भरली ओटी
