गणपतराव देशमुख यांच्या रुपाने महाराष्ट्राने राजकारणातील भीष्म पितामह गमावला, गृहमंत्री दिलीप वळसे-पाटील

शेकापचे ज्येष्ठ नेते गणपतराव अण्णासाहेब देशमुख यांच्या निधानामुळे महाराष्ट्राने एक भीष्मपितामह गमावला असल्याची भावना राज्याचे गृहमंत्री दिलीप वळसे पाटील यांनी पुण्यात माध्यमांशी बोलताना व्यक्त केली.

पुणे - गणपतराव देशमुख यांनी महाराष्ट्राच्या विधानसभेत 50 वर्षापेक्षा जास्त नेतृत्व केलं आहे. ते करत असताना दुष्काळी भागातील नागरिकांचे प्रश्न, सर्वसामान्य नागरिकांचे प्रश्न हे नेहेमी मांडण्याचं प्रयत्न गणपतराव देशमुख यांनी केलं आहे. अतिशय विद्वान, अतिशय संयमी, शांत अशी भूमिका त्यांची नेहमीच राहिली आहे. साधेपणाने राहणे आणि कोणाकडेही जाणं ही त्याची खासियत राहिलेली आहे. मला गणपतराव देशमुख यांच्याबरोबर 25 वर्षांपेक्षा जास्त काम करायला मिळालं. काही दिवस तर आम्ही दोघंही एकाच बेंचवर त्यांच्याबरोबर बसत होतो. त्याच्या शिकवणीचा खूप मोठा फायदा आम्हा सर्वांना झाला आहे. गणपतराव देशमुख यांच्या निधनाने राज्याच्या राजकारणात पोकळी निर्माण झाली आहे, जी कधीच भरून निघणार नाही, अशी भावना राज्याचे गृहमंत्री दिलीप वळसे पाटील यांनी व्यक्त केली.

गणपतराव देशमुख हे नेहमी तयारी करूनच सभागृहात येत असत -

गणपतराव देशमुख हे नेहेमी तयारी करूनच सभागृहात येत असतं. तयारी केल्याशिवाय सभागृहात कधीही आले नाहीत. तयारी करूनच ते आपलं मत सभागृहात मांडत असत. मग ते मत ते सरकारला आवडो किंवा न आवडो...ते नेहेमी अशाच पद्धतीने आपलं मत मांडत असत. मी विधानसभेचा अध्यक्ष असतानाही ते सभागृहात होते. त्यावेळेला त्याच्या उपयुक्त सूचना या सरकारसाठी आणि उपस्थित आमदारांसाठी कायम स्मरणात राहिल्या आहे. अशा आठवणी देखील यावेळी वळसे पाटील यांनी व्यक्त केल्या.

डिसीपी ऑडिओ क्लिप प्रकरणात दोन्ही बाजूने तपास होणार -

डीसीपींच्या ऑडियो क्लिप संदर्भात डिसीपी यांनी जी काही माहिती काल समाजमाध्यमामध्ये दिली आहे. ती अतिशय गंभीर असून पोलीस आयुक्तांना मी सूचना दिल्या आहेत कि या प्रकरणात दोन्ही बाजूने तपास व्हायला हवा. त्याचा अहवाल सादर झाल्यानंतर याबाबतची भूमिका राज्य सरकार घेईल असंही यावेळी वळसे पाटील यांनी सांगितले.