पुणे- छत्रपती शिवरायांच्या सरदारांनी युद्धात वापरलेल्या शस्त्रांची ओळख सर्वसामान्य नागरिकांना व्हावी. यासाठी पुण्यातील बालगंधर्व येथे शिवकालीन शस्त्रांचे प्रदर्शन भरवण्यात आले आहे. या प्रदर्शनाच्या माध्यमातून शिवकालीन शस्त्रांची माहिती सर्वसामान्य नागरिकांपर्यंत पोहचवण्यात येत आहे. सह्याद्री प्रतिष्ठानच्या वतीने या प्रदर्शनाचे आयोजन करण्यात आले आहे.
या प्रदर्शनात 200हून अधिक शस्त्रे मांडण्यात आली आहेत. यामध्ये मराठा तलवार, भाले, कट्यार, ढाली, शमशेर, मुठी, वाघनखे आणि इतर शस्त्र शिवप्रेमींचे लक्ष वेधून घेत आहेत. या प्रदर्शनात छत्रपती शिवाजी महाराजांनी युद्ध जिंकण्यासाठी कोणत्या प्रकारची शस्त्रे वापरली याची माहिती देण्यात येत आहे.
शुक्रवारी सकाळी दहा वाजता सुरू झालेले हे प्रदर्शन 24 नोव्हेंबरपर्यंत सकाळी 10 ते रात्री 8 या वेळेत सुरू राहील. या प्रदर्शनात प्रत्येक शस्त्राची माहिती दर्शकांना देण्यात येत आहे. ही शस्त्रे पाहण्यासाठी नागरिकांनी पहिल्याच दिवशी मोठी गर्दी केली.
