पणजी - काँग्रेसने पणजीवासीयांकडून जाहीरनाम्यासाठी सूचना मागवल्या होत्या. त्याला उत्स्फूर्त प्रतिसाद देत ५ हजारांहून अधिक सूचना प्राप्त झाल्या होत्या. त्यामधूनच छाननी करून जाहीरनामा तयार केला आहे. त्यामुळे विधानसभेत प्रतिनिधित्त्व करण्याची संधी दिल्यास पुढील २ वर्षांत यामधील ८० टक्के वचने पूर्ण करेल, अशी ग्वाही पणजी विधानसभा पोटनिवडणुकीतील काँग्रेसचे उमेदवार बाबूश मोन्सेरात यांनी आज दिली.
मळा-पणजी येथे प्रचारसभा आयोजित करण्यात आली होती. यावेळी मोन्सेरात बोलत होते. गेल्या २५ वर्षांपासून पणजी विधानसभा भाजपकडे होती. त्यांच्या आमदाराने विकास केला असता तर लोक माझ्या सभेला मोठ्या संख्येने जमले नसते. त्यामुळे पणजीचा प्रतिनिधी झाल्यास प्रत्येक कुटुंबात सरकारी नोकरी देईल, असे आश्वासनही त्यांनी दिले.
२४ मे ला गोव्यात काँग्रेसचे सरकार -
पाणी डोक्यावरून जात असल्याचे सरकारमधील घटकपक्षांना कळून चुकले आहे. त्यामुळे ते प्रचारात कुठेच दिसत नाहीत. येत्या २४ मे रोजी गोव्यात काँग्रेसचे सरकार असेल, असा विश्वासही त्यांनी व्यक्त केला.
भाजप उमेदवार कसा अपयशी आहे? तसेच तो भ्रष्टाचाराने बरबटलेला असल्याचे प्रदेशाध्यक्ष चोडणकर यांनी सांगितले. तसेच भाजपचे हिंदू प्रेम कशाप्रकारे बेगडी आहे? हेही त्यांनी यावेळी सांगितले. यावेळी आमदार कामत, आलेक्स रेजिनाल्ड, प्रतिमा कुतिन्हो, कवळेकर, मडकईकर यांनी बाबूश मोन्सेरात यांना मत देण्याचे आवाहन केले. यावेळी पणजी मतदारसंघातील लोक मोठ्या संख्येने उपस्थित होते.
