नाशिक - सरकारने पुढच्या सोमवारपर्यंत मंदीरे उघडा, अन्यथा राज्यभर तीव्र आंदोलन छेडण्यात येईल असा इशारा भाजप अध्यात्मिक आघाडीकडून सरकारला देण्यात आला आहे. आज भाजप आध्यात्मिक आघाडीच्या माध्यमातून त्र्यंबकेश्वर मंदीरासमोर घंटानाद आंदोलन करण्यात आले. 'दार उघड, उद्धवा दार उघड' अशा घोषणा देत सरकारचा निषेध करण्यात आला, यावेळी आंदोलनकर्त्यांनी मंदिराबाहेर रस्त्यावर पूजा करून त्र्यंबकराजाची आरती केली. आज श्रावणातील पहिला सोमवार असल्याने मोठया प्रमाणात भाविक मंदिरात येतील म्हणून मंदिर परिसरात मोठा पोलीस बंदोबस्त तैनात करण्यात आला आहे.
अनेकांचे व्यवसाय बंद -
कोरोना नियमात सरकारने बहुतांश जिल्ह्यात शिथिलता दिली आहे. यात सर्व दुकाने सुरू करण्याची परवानगी दिली आहे. अशात फक्त मंदिर बंद असून यावर अवलंबून असलेली पूजा साहित्याचे व्यवसाय अडचणीत येत असून यावर उपजीविका चालवणाऱ्या हजारो लोकांवर उपासमारीची वेळ आल्याचं म्हणतं लवकरात लवकर मंदिर सुरळीत सुरू करावी, अन्यथा राज्यभर केलं जाईल असा इशारा भाजप अध्यात्मिक आघाडीने दिला आहे.
गोदावरीच्या उगमस्थानी -
नाशिक शहरापासून 35 किलोमीटर अंतरावर त्र्यंबकेश्वर महादेवाचे अतिप्राचीन मंदिर आहे. हे मंदिर गोदावरी नदीच्या उमगस्थान असलेल्या त्र्यंबकेश्वर, नाशिक येथे आहे. या ज्योतिर्लिंगाचे वैशिष्ट्य म्हणजे शिवलिंगास ब्रम्हा, विष्णू, महेश या तिघांच्या प्रतिमा आहेत. मंदिराचा जिर्णोधार हा इ.स. 1755 ते 1780 मध्ये यांनी नानासाहेब पेशवे यांनी केल्याचा उल्लेख आढळतो. या ज्योतिर्लिंगाजवळ ब्रह्मगिरी नावाचा पर्वत असून या पर्वतावरून गोदावरी नदीचा उगम झाला आहे. तर भगवान शिवाचे त्र्यंबकेश्वर महादेव मंदिर आहे.
हेही वाचा - श्रावणी आरंभ : विठ्ठल-रुक्मिणी मंदिराच्या गाभाऱ्यात सुंदर फुले व पानांची आरास
हेही वाचा - आता व्हॉट्सअ‌ॅपद्वारे काही सेकंदातच मिळणार कोरोना लसीकरण प्रमाणपत्र; केंद्रीय आरोग्य मंत्रालयाची माहिती
