कोरोनामुळे पारावर भरते शाळा... 'पुस्तक आले भेटीला' उपक्रम यशस्वी

कोरोना काळात विद्यार्थी शिक्षणापासून वंचित राहू नये, यासाठी नाशिकच्या मनपा शाळेतील शिक्षिका कुंदा बच्छाव यांनी विद्यार्थ्यांना थेट पारावर धडे देण्यास सुरुवात केली. तसेच 'पुस्तक आले भेटीला' या उपक्रमाद्वारे विद्यार्थ्यांमध्ये वाचनाची आवड निर्माण करण्याचा प्रयत्न बच्छाव मॅडम करत आहेत.

नाशिक - कोरोना काळात विद्यार्थी शिक्षणापासून वंचित राहू नये, यासाठी नाशिकच्या मनपा शाळेतील शिक्षिका कुंदा बच्छाव यांनी विद्यार्थ्यांना थेट पारावर धडे देण्यास सुरुवात केली. तसेच 'पुस्तक आले भेटीला' या उपक्रमाद्वारे विद्यार्थ्यांमध्ये वाचनाची आवड निर्माण करण्याचा प्रयत्न बच्छाव मॅडम करत आहेत.

नाशिक जिल्ह्यात कोरोनाचा प्रादुर्भाव कमी झाला असला तरी अद्याप शाळा बंदच आहेत. खासगी तसचे शासकीय शाळा विद्यार्थ्यांना ऑनलाइन शिक्षण देत आहेत. अशात महानगरपालिकेच्या शाळेतील विद्यार्थी आर्थिकदृष्ट्या दुर्बल असल्याने बहुतांश विद्यार्थ्यांकडे स्मार्ट फोन नाहीत. यामुळे ते शिक्षणापासून वंचित राहत आहेत. मात्र नाशिक महानगरपालिकेच्या शाळा क्रमांक 18 च्या शिक्षिका कुंदा बच्छाव यांनी हा अडथळा पार करत शिक्षणाची गंगा वाहती ठेवली आहे. मागील दोन महिन्यांपासून थेट विद्यार्थ्यांपर्यंत पोहोचून शिक्षणाचे धडे बच्छाव मॅडम देत आहेत. शिक्षिका थेट मुलांपर्यंत पोहोचत असल्याने विद्यार्थ्यांनी देखील चांगला प्रतिसाद दिला आहे.

'पुस्तक आले भेटीला'

मनपा शाळा क्रमांक 18 च्या शिक्षिका कुंदा बच्छाव यांनी विद्यार्थ्यांसाठी 'पुस्तक आले भेटीला' हा उपक्रम सुरू केला आहे. शाळेतील पुस्तके, स्वतःच्या घरातील अवांतर वाचनाची पुस्तके तसेच समाज सहभागातून मिळालेली पुस्तके घेऊन त्या दर आठवड्यातील तीन दिवस आनंदवली गावातील मध्यवर्ती ठिकाणी असलेल्या पारावर विद्यार्थ्यांना वाचनासाठी उपलब्ध करतात. या पुस्तकात जनरल सामाजिक ज्ञान, गाणी, गोष्टी, समाजसेवकांचा समावेश आहे.

पापेट-शो मार्फत दिले जाते शिक्षण

विद्यार्थ्यांना शिक्षणाची गोडी लागावी यासाठी शिक्षिका कुंदा बच्छाव या पापेट शो च्या माध्यमातून विद्यार्थ्यांना शिक्षणाचे धडे देत आहे.मनोरंजन पद्धतीने शिक्षणाचे धडे मिळत असल्याने विद्यार्थी देखील ते सहज आत्मसात करत असल्याचे शिक्षिका बच्छाव सांगतात.

परावरच्या शाळेचा आनंद वेगळाच

मागील आठ महिन्यांपासून शाळा कोरोनामुळे बंद आहे. अशात स्मार्ट फोन नसल्याने आम्हाला शिक्षण घेता येत नव्हते. मात्र बच्छाव मॅडम मागील दोन महिन्यांपासून पारावर शिकवत असल्याचे विद्यार्थ्यांनी सांगितले. त्या येताना गोष्टींची पुस्तकं आणतात. यामुळे ज्ञानात भर पडते. पापेट शोच्या माध्यमातून त्या शिक्षण देत असल्याने अभ्यास करताना कंटाळा येत नाही. आम्ही शालेय गणवेश घालून पारावरच्या शाळेत येत असल्याचे विद्यार्थ्यां सांगतात.

सोशल डिस्टन्सिंगचं पालन

नाशिक जिल्ह्यात कोरोनाचा प्रादुर्भाव कमी होत असला तरी, शिक्षिका कुंदा बच्छाव घेत पारावरील शाळेत विद्यार्थ्यांची विशेष काळजी घेण्यात येत आहे. असून प्रत्येक विद्यार्थ्यांमध्ये एका फुटाचे अंतर ठेवण्यासोबतच सर्वांना मास्क वापरणे बंधनकारक करण्यात आले आहे. तसेच शाळेत येणाऱ्या प्रत्येक विद्यार्थ्यांचे हॅन्ड सॅनिटाईझ करण्यात येतात.