नाशिक - नाशिकच्या टीबीटीन मार्केट परिसरातील शरणपूर रोड येथे चालत्या चारचाकी गाडीवर एक झाड अचानकपणे कोसळले. यामध्ये कारचालक राकेश पाटील हे बालबाल बचावले आहेत. ही घटना शनिवारी दुपारच्या सुमारास घडली आहे.
झाड कोसळल्याने कार चालक बालबाल बचावले
नाशिकच्या कॉलेजरोड परिसरात एक झाड अचानकपणे उन्मळून पडले. यामध्ये दोघेजण जखमी झाल्याची घटना ताजी असतानाच, पुन्हा एकदा नाशिकच्या शरणपूर रोड परिसरातील तिबेटीयन मार्केट भागात असलेले गुलमोहराचे झाड अचानकपणे उन्मळून पडले. यावेळी मोठा अनर्थ टळला. शनिवारी दुपारी दोन वाजेच्या सुमारास राकेश पाटील हे आपल्या कामासाठी येथील एचडीएफसी बँकेतून घरी जात असताना (वाहन क्रमांक एम. एच.15 बी. एक्स. 8846 )आणि तेथे उभ्या असलेल्या एका दुचाकीवर झाड कोसळले. यामध्ये कार चालक राकेश पाटील हे बालबाल बचावले आहेत. दरम्यान, पाटील यांच्या कारसह येथे उभी असलेल्या दुचाकीचे मोठ्या प्रमाणात नुकसान झाले आहे.
झाडे कोसळण्याचे सत्र सुरूच
गेल्या काही दिवसांपासून नाशिक शहरातील विविध ठिकाणी अचानकपणे झाडे उन्मळून पडण्याच्या घटनांमध्ये मोठ्या प्रमाणावर वाढ झाली आहे. शरणपूररोड, गोविंदनगर या भागात गुलमोहराची 3 झाडे कोसळली आहेत. वाऱ्यांचा वेग जास्त असल्याने, शहरातील शरपुर रोड येथे दोन तर, इंदिरा नगर येथे एक झाड पडले आहे. वाऱ्याचा वेग जास्त असल्याने वाहनचालकांनी वाहन चालवताना आणि आपले वाहन पार्क करत असताना योग्य ती सतर्कता बाळगावी, असे आवाहन अग्निशमन विभागाकडून करण्यात आले आहे.
