भाजपचे महावितरणला टाळे ठोको आंदोलन, आ. देवयानी फरांदे यांच्यासंह २५ आंदोलनकर्त्यांवर गुन्हे

अवास्तव वाढीव वीज बिल प्रकरणी भाजपने महावितरण कार्यालयाला टाळे ठोकत आंदोलन केलं होतं. शासकीय कामात अडथळा आणल्याप्रकरणी भाजप आमदार देवयानी फरांदे, शहराध्यक्ष गिरीश पालवे यांच्यासह 25 कार्यकर्त्यांवर सरकावाडा पोलीस ठाण्यात गुन्हा दाखल केला आहे.

नाशिक - अवास्तव वाढीव वीज बिल प्रकरणी भाजपने महावितरण कार्यालयाला टाळे ठोकत आंदोलन केलं होतं. यावेळी पोलीस कर्मचारी आणि भाजप पदाधिकाऱ्यांमध्ये झटापट झाली. याचा ठपका ठेवत शासकीय कामात अडथळा आणल्याप्रकरणी भाजप आमदार देवयानी फरांदे, शहराध्यक्ष गिरीश पालवे यांच्यासह 25 कार्यकर्त्यांवर सरकावाडा पोलीस ठाण्यात गुन्हा दाखल केला आहे.

आंदोलकांनी बेकायदेशीर कृत्य केल्याने कारवाई -

शरणपूर रोडवरील तिबेटीयन मार्केट येथील महावितरण कंपनीच्या कार्यालयाजवळ फक्त आंदोलनासाठी परवानगी दिलेली होती. असे असताना उपनिरीक्षक प्रियंका गायकवाड यांच्या तक्रारीनुसार भाजपच्या आमदार देवयानी फरांदे यांच्यासह २५ कार्यकर्त्यांवर गुन्हे दाखल करण्यात आले. यावेळी आंदोलकांनी बेकायदेशीर कृत्य केल्याने कारवाई करण्यात आल्याचे पोलिसांनी सांगितले.

पोलीस आणि भाजपा पदाधिकारी यांच्यात झाली होती बाचाबाची -भाजपने महाराष्ट्रात सर्वच जिल्ह्यात आक्रमक भूमिका घेत महावितरण कार्यालयाला टाळे ठोक आंदोलन केलं होतं. नाशिकमध्ये सुद्धा भाजपच्या वतीने शरणपूर रोडवरील महावितरण कार्यालयाबाहेर जोरदार आंदोलन केलं. या आंदोलनादरम्यान पोलीस आणि भाजप पदाधिकारी यांच्यात बाचाबाची झाली होती. महावितरण कार्यालयाच्या गेटवर पोलिसांनी आंदोलकांना रोखण्यासाठी गेट लावले होते. ते सुद्धा बाजूला करून भाजपच्या कार्यकर्त्यांनी आतमध्ये प्रवेश केला होता. त्यावेळेस भाजपा कार्यकर्तानी जोरदार घोषणाबाजी केली होती.