नागपूर- उपराजधानी नागपूरमध्ये केवळ वैयक्तिक वादाचा वचपा काढण्यासाठी आरोपीने १६ वर्षीय विद्यार्थी राज पांडेचा निर्घृण खून केल्यामुळे समाजमन सुन्न झाले आहे. त्यातच आता राजने गायलेले गाणे समाज माध्यमांवर वायरल झाले. त्यापैकी 'आयेगी तुम्हे मेरी याद वफाये मुझे भूल ना पयोगे' या गाण्याने तर संपूर्ण इंदिरा मातानगर या वस्तीमधील नागरिकांना अश्रू अनावर झाले होते.
वैयक्तिक वादाचा बळी ठरलेला राज हा उत्तम गायक होता. त्याच्या वस्तीतील लहान मुले त्याच्याकडे नेहमीच गाणे गाण्यासाठी हट्ट धरायचे. तो खड्या आवाजात गात असल्याने इंदिरा मातानगरातील मुले त्याच्या आवाजाला दाद देत असत. त्याने गायलेले अनेक गाणे मित्रांनी रेकॉर्ड करून वायरल केले आहेत. मात्र "आयेगी तुम्हे मेरी याद वफाये मुझे भूल ना पयोगे..करोगे फरियाद रो रो के किसी को बता न पाओगे" हे गाणे त्याच्या खुनानंतर निर्माण झालेल्या परिस्थितीवर अगदी प्रत्यक्षात उतरेल, असा विचार कुणीही केला नव्हता.
हेही वाचा-धुळे : शिरपूर शहराजवळ बनावट दारूचा कारखाना उद्ध्वस्त
आरोपीला फाशी द्या-
राजचा खून झाल्याची बातमी संपूर्ण इंदिरा मातानगर वस्तीत वाऱ्यासारखी पसरली. रोज आवाजात गाणे ऐकायला मिळायची तो आवाज कायमचा शांत झाल्याचे वृत्त नागरिकांना सहन होत नव्हते. आमच्या राजचा खून करणाऱ्या मारेकऱ्यांना फाशीची शिक्षा द्या, अशी मागणी नागरिकांनी केली आहे.
हेही वाचा-बीडच्या गेवराईत शेतीच्या वादातून दोन गटामध्ये तुंबळ हाणामारी
काय आहे खुनाची घटना-
१६ वर्षीय राज पांडे नामक विद्यार्थ्यांच्या खून प्रकरणात खळबळजनक खुलासा झाला आहे. या प्रकरणातील आरोपी सुरज रामभुज शाहू याने मृतकाच्या काका मनोज पांडे यांच्यासोबत असलेल्या वादाचा वचपा काढण्यासाठी राजचा खून केल्याची माहिती पुढे आली आहे. या घटनेमुळे संपूर्ण नागपूर जिल्हा हादरून गेला असून राज पांडे खून प्रकरणात अनेक धक्कादायक खुलासे झाल्याने नागपूर पोलीससुद्धा थक्क झाले आहेत. आरोपी सूरज आणि मृतक राज हे एमआयडीसी पोलीस ठाण्याच्या हद्दीतील इंदिरा मातानगर या एकाच वस्तीत राहतात.
गेल्या काही महिन्यांपासून कौटुंबीक कारणामुळे आरोपी सुरज हा मृतक राजच्या काकांवर चिडलेला होता. त्याला मनोजला दुःख देऊन नुकसान पोहचवायचे होते. या विचाराने आरोपी सुरज गेली अनेक दिवस संधीच्या शोधात होता. आरोपीने सुरूवातीला मनोजच्या मुलाचा काटा काढण्याचे ठरविले होते. परंतु, मनोजची मुले वयाने मोठी असल्याने ते शक्य होणार नाही हे समजल्यानंतर त्याने मनोजचा पुतण्या राजकडे आपलं लक्ष केंद्रीत केलं होतं.
हेही वाचा-5 जणांच्या आंतरराज्य चेन स्नॅचिंग करणाऱ्या टोळीला अटक
